दुर्गा प्रसाईलाई एमालेबाट निष्काशन गर्न प्रदेश १ कमिटीको सिफारिस

७ फागुन, झापा। फागुन १ गते झापाको काकडभित्ता मेची पुलबाट राष्ट्र, राष्ट्रियता, धर्म, संस्कार र नागरिक बचाउ महाअभियान’ शुरु गरेका नेकपा एमालेका केन्द्रीय सदस्य एवं मेडिकल व्यवसायी दुर्गा प्रसाईलाई कारवाही गरी निष्काशन गर्न प्रदेश १ कमिटीले केन्द्रीय कमिटीलाई सिफारिस गरेको छ।

एमाले प्रदेश कमिटी बैठकले मेडिकल व्यवसायीसमेत रहेका प्रसाईंले पार्टीको नीति, सिद्धान्तविपरीत गतिविधि गरेको भन्दै उनलाई पार्टीबाट निकालेर कारबाही गर्न केन्द्रीय कमिटीलाई सिफारिस गरेको हो ।

एमाले केन्द्रीय सदस्य प्रसाईंले यही फागुन १ गते पूर्वराजा ज्ञानेन्द्र शाह तथा उनका छोरा पारसलाई सहभागी गराई मेचीनगर–६ मा ‘नागरिक बचाउ महाअभियान’को उद्घाटन गराएका थिए । प्रसाईंको यो अभियानको उद्घाटन पूर्वराजा ज्ञानेन्द्र शाहले गरेका थिए । पूर्वराजपरिवारका सदस्यसहित सहभागी भएका शाहले दीप प्रज्ज्वलन गरेर र परेवा उडाएर उद्घाटन गरेका थिए ।

कार्यक्रममा पूर्वराजासँगै पूर्वरानी कोमल शाह, पूर्वराजकुमार पारस, पूर्वराजकुमारी शिताष्म शाह सहभागी भएका थिए। पार्टीलाई कुनै खबर नै नगरी राजावादी तथा हिन्दु अतिवादीहरुसँग मिलेर कार्यक्रम गरेको भन्दै उनको आलोचना हुँदै आएको थियो ।

दुर्गा प्रसाईको पछिल्लो समय पार्टीको नीति र सिद्धान्तविपरीत, संविधानविरोधी र राजतन्त्रको वकालतमा प्रस्तुत हुन थालेपछि कारवाहीसहितको राय केन्द्रीय कमिटीलाई सिफारिस गरिएको एमाले प्रदेश १ कमिटीका इन्चार्ज राजेन्द्र गौतमले जानकारी दिए ।