६ महिना कैद सजाय पाएका सांसद चौधरी पक्राउ परेको १८ दिनमै जेलमुक्त

७ फागुन, काठमाडौं । ट्रयाक्टरमा आगजनी कसुरमा ६ महिना कैद सजाय र ८ लाख रुपैयाँ क्षतिपूर्ति भराउने कैद सजाय पाएका नागरिक उन्मुक्ति पार्टीका संघीय सांसद अरुणकुमार चौधरी पक्राउ परेको १८ दिनमै जुलमुक्त भएक छन् ।

झण्डै १३ वर्षअघि २०६६ भदौ ३ गते लु २ त २११ नम्बरको ट्याक्टरमा आगो लगाएर ध्वस्त बनाएको घटनामा कैलाली जिल्ला अदालतले २०७० वैशाख ९ गते उनीसहित ३ जनालाई आगजनी घटनामा दोषी ठहर गर्दै ६ महिना जेल कैद र जनही ८ लाख रुपैयाँ क्षतिपूर्ति भराउन फैसला भएको थियो ।

सोही अनुरुप अन्य दुई जनाले क्षतिपूर्ति भराउनुका साथै कैद सजाय भोगेर थुनामुक्त भइसकेका छन् । तर चौधरी भने घटना भएदेखि नै फरार हुँदै प्रहरीको आँखा छल्दै आएकामा २०७९ माघ १९ गते मात्र बाँकेको कोहलपुरबाट पक्राउ परेका थिए ।

त्यसपछि उनलाई भोलिपल्ट २० गते नै कैलालीको जेलमा थुनामा राखिएको थियो । यसबिचमा सरकारमा सुरु भएको राजनीतिक उतारचढाव र शक्ति सन्तुलन जोगाउने खेलमा परेर उनलाई सरकारले आज परेको प्रजातन्त्र दिवसको अवसरमा पारेर ५० प्रतिशत कैद भुक्तान गरिकिेका केदीलाई दिइने आममाफी मिनाहाको सुविधा पाउने सूचीमा राखेर थुनामुक्त गरिएको हो ।

उनलाई कैलाली जिल्ला कारागारबाट रिहा हुने क्रममा स्वागत गर्न आज बिहान नाउपाकी अध्यक्ष समेत रहेका सांसद रञ्जिता श्रेष्ठ चौधरी गरेकी छन् ।

अदालतबाट दोषी ठहर भएका चौधरीको रिहाइका लागि अध्यक्ष चौधरीले सरकारलाई सदनबाट निरन्तर दबाब दिँदै आएकीथिइन् । गएको हप्ता संसद बैठकमा नाउपाका अर्का सांसद गंगाराम चौधरीले चौधरीलाई राजनीतिक प्रशोधपूर्ण तरिकाले पक्राउ गरिएको भन्दै तत्काल रिहाई नगरिए सदन चल्न नदिने चेतावनी दिएका थिए ।

त्यसपछिदेखि नै चौधरीलाई रिहाईको कानूनी बाटो खोजिरहेको सरकारले कैद भुक्तानको करिब १२ प्रतिशत मात्र पूरा गरेका चौधरीलाई रिहा गरेको छ । चौधरीको रिहाईले कानूनी व्यवस्थाको धज्जी उडाएको विश्लेषण सुरु भएको छ ।

प्रचण्ड नेतृत्वको सरकारलाई नाउपालाई सहभागी गराउनुपर्ने राजनीतिक बाध्यता परेको छ । साेही कारण चाैधरीले उन्मुक्ति पाएका छन् ।