विकासका लागि राजनीतिक स्थिरता आवश्यकः मुख्यमन्त्री शाह

७ फागुन , धनगढी । सुदूरपश्चिम प्रदेशका मुख्यमन्त्री कमलबहादुर शाहले विकासका लागि राजनीतिक स्थिरता आवश्यक रहेको बताएका छन् ।

आइतबार धनगढीमा प्रदेश सरकारको आयोजनामा भएको प्रजातन्त्र दिवसमा मुख्यमन्त्री शाहले प्रदेशको विकास र समृद्धिका लागि स्थिर राजनीति कायम गर्न सबै दल एक ठाउँमा उभिनुपर्ने बताए । उनले सहिद दशरथ चन्दको शालिकमा माल्यार्पण गरेका थिए ।

एमाले नेतृत्वको सरकार ढलेपछि गएको माघ २६ गते शाह मुख्यमन्त्री बनेका थिए । उनलाई यही फागुन २६ गतेभित्र प्रदेशसभा बैठकबाट विश्वासको मत लिनुपर्ने बाध्यता रहेको छ ।

पुष २७ मा नियुक्त एमालेका राजेन्द्र सिंह रावल बैठकमा विश्वासको मत प्राप्त गर्न असफल भएकै कारण पदच्युत हुन पुगेका थिए ।