दूधको मूल्य लिटरमै १० रूपैयाँ बढाउने व्यवसायीहरूकाे याेजना

८ फागुन, काठमडौं । दूधको मूल्य प्रतिलिटर दश रूपैयाँका दरले बढाउन उद्योगी व्यवसायीहरू पुनः सल्बलाउन थालेका छन् । यसअघि महिना दिनपहिले सरकारलाई थाहै नदिइ उनीहरु आफैंले प्रतिलिटर १४ रुपैयाँ बढाएर बजारबाट दुइई दिनसम्म मुल्य असुलेका थिए । त्यसमा सरकारले हस्तक्षेप गरेर रोकेको थियो ।

त्यसको महिना दिन नबित्दै उनीहरु फेरि मुल्य बढाउने पर्ने प्रस्ताव ल्याएर सरकारसँग प्रस्तुत भएका छन् । दूध उत्पादनको लागत बढेको भन्दै उनीहरुले दूधको मूल्य बढाउन प्रस्ताव गरेका हुन् ।

राष्ट्रिय दुग्ध विकास बोर्डले दुग्ध विकास संस्थान, नेपाल डेरी एसोसिएसन, डेरी उद्योग संघ र केन्द्रीय दुग्ध सहकारी संघको समन्वयमा कृषि तथा पशुपंक्षी विकास मन्त्रालयलाई प्रस्ताव गरेको नेपाल डेरी एसोसिएसनका अध्यक्ष प्रल्हाद दाहालले बताए ।

प्रस्तावलाई छलफलका लागि कृषि तथा पशुपंक्षी विकास मन्त्रालयले आज बस्ने मन्त्री परिषद्को बैठकमा लैजाने भएको छ । अहिले सरकारले दूधजन्य वस्तुमा आत्मनिर्भर बनाउने योजनामुताविक दूध तथा दुग्धजन्य पदार्थ आयातमा प्रतिबन्ध लगाएको छ ।

हरेक दुई दुई वर्षमा मात्र दूधको मूल्य परिवर्तन गर्न पाइने भन्ने सरकार र उद्योगीहरुबीच भएको सहमतिविपरीत उनीहरु प्रस्ताव लिएर अघि सारेका हुन् । पछिल्ल्लो पटक गरेको सहमतिको समय अर्को वर्ष मात्र हुनेछ ।

दूधजन्य काला बजारियाको योजनामा उपभोक्तालाई मार खुवाएर चरम नाफा उठाउने उद्देश्यबाट प्रस्ताव आएको भन्दै प्रस्ताव सुनुवाइ हुन नसक्ने मन्त्रालय स्रोतको भनाइ छ । अहिले दूध उपभोक्ता मूल्य प्रतिलिटर ८६ रुपैयाँ रहेको छ ।