त्रिभुवन अन्तर्राष्ट्रिय विमानस्थलको सर्भरमा समस्या, सम्पूर्ण उडान प्रभावित

८ फागुन, काठमाडौं । चालू अवस्थामा रहेको एक मात्र अन्तर्राष्ट्रिय विमानस्थल त्रिभुवन अन्तर्राष्ट्रिय विमानस्थल (टीआईए)को अध्यागमन विभागको प्रशासनिक सफ्टवेयर, सर्भर डाउन हुन पुगेको छ ।

सोमबार दिउँसो करिब १ बजेदेखि विमानस्थलको अध्यागमन विभागमा सफ्टवेयरमा समस्या आउँदा अन्तर्राष्ट्रिय उडानहरू प्रभावित हुन पुगेको टीआईएका प्रवक्ता टेकनाथ सिटौलाले जानकारी दिएका छन् । समस्या समाधानका लागि प्राविधिक टोलिहरु खटिरहेको उनले बताए ।

सर्भरको समस्याले अध्यागमनको डिपाचर, इम्रिग्रेसनको काम रोकिँदा उडान समेत बन्द भएको छ । टीआई, अध्यागमनमा सञ्चालित सफ्टवेयर पनि सिंहदरबारकै भएको र एक ठाउँमा समस्यामा आउँदा विमानस्थलमा असुर पुग्ने गरिएको छ ।

यसअघि गत माघ १५ गते प्रायः सबै सर्भर बन्द भएर सरकारी वेबसाइटहरू एकैपटक डाउन हुँदा सरकारी सेवा ३ दिनसम्म बन्द भएको थियो । त्यसबेला संचारमन्त्री रेखा शर्माले सरकारी डाटा सेन्टरको चाबी नेपालसँग नरहेको र त्यो कहाँ छ भनेर खोजी गर्नुपर्ने बेला आएको बताएकी थिइन् । त्यसपछि सरकारको झनै आलोचना भएको थियो ।