महाशिवरात्रीमा पशुपति आएका साधुहरुलाई दक्षिणासहित बिदाइ गरियो [तस्बिरहरू]

८ फागुन, काठमाडौं । पशुपति क्षेत्र विकास कोषले महाशिवरात्रीमा भारत र अन्य मुलुकबाट सहभागी हुन सयौंको संख्यामा आएका साधुसन्तलाई दक्षिणासहित बिदाइ गरेको छ ।

सोमबार कोषले भारतसहित विभिन्न देशबाट आएका चार हजारभन्दा बढी साधुसन्तको बिदाइ गरेको हो । वरीयताका आधारमा दक्षिणा र रुद्राक्षको माला दिएर साधुसन्तको बिदाइ गरिएको छ । साधुसन्तको वरीयताको आधारमा ५०० देखि बढीमा ९ हजार २०० रुपैयाँसम्म दक्षिणा दिएर बिदाइ गरिएको कोषका कार्यकारी निर्देशक घनश्याम खतिवडाले बताए ।

शिवरात्रिका बेला साधुहरुले भक्तजनबाट पनि दक्षिणा पाएको र कोषको तर्फबाट पनि दक्षिणास्वरुप साधुसन्तहरुलाई बिदाइ गर्ने प्रचलनअनुसार दक्षिणा दिइ आज बिदाइ गरिएको उनले बताए ।

यस वर्षकाे महाशिवरात्री गएकाे शनिबार परेकाे थियाे । हरेक वर्ष शिवरात्रीमा साधुहरू नेपाल आउने गर्दछन् । उनीहरू घर छाडेर हिँडेका हुन्छन् ।