माेरङमा एक महिलाकाे निर्मम तवरले हत्या, श्रीमानसहित ३ जना पक्राउ

८ फागुन, मोरङ । विराटनगर महानगरपालिका–१९ की २८ वर्षीया प्रियंका सुनारको हत्या घटनामा प्रहरीले ३ जना पक्राउ गरेको छ । यसअघि प्रहरीले प्रियंकाका श्रीमान रमेश साह र कटहरी गाउँपालिका–५ का रमानन्द रामलाई पक्राउ गरिसकेको छ ।

सोमबार दिउँसो कटहरी गाउँपालिका–५ का उमेश सरदारलाई पनि पक्राउ गरिएको जिल्ला प्रहरी कार्यालय मोरङले जनाएको छ । रमानन्द शव व्यवस्थापनमा संलग्न भएको देखिएको र त्यस क्रममा उमेशको गाडी प्रयोग भएको प्रारम्भिक अनुसन्धानका क्रममा पाइएको छ ।

प्रियंकाको शव मोरङको बूढीगंगा गाउँपालिका–२ अमाहीस्थित नरसिंह चौधरीको गोठमा बोराभित्र फेला परेको थियो । आइतबार दिउँसो १२ बजेतिर घाँटी र शरीरमा चोटपटक रहेको शव भेटिएपछि नरसिंहमाथि पनि प्रहरीले सोधपुछ गरिरहेको छ ।

शव व्यवस्थापनका लागि उपयुक्त ठाउँ खोजी गर्दै नरसिंहको घरसम्म प्रियंकाको शव लगेको देखिएको प्रहरीले बताएको छ । शवलाई पोस्टमार्टमका लागि कोसी अस्पतालमा राखिएको छ ।