सुन आयातमा लगाइएको कोटा प्रणाली हटाउन व्यवसायीहरुको माग

८ फागुन, काठमाडौं । नेपालका सुन चाँदी व्यवसायीहरुले सरकारले सुन आयातमा लगाउँदै आएको कोटा प्रणाली हटाउन माग गरेका छन् । सोमबार काठमाडौंमा नेपाल सुनचाँदी व्यववसायी महासंघ, नेपाल सुनचाँदी, रत्न तथा आभूषण महासंघ र नेपाल हस्तकाल महासंघले पत्रकार सम्मेलन गरेर यस्तो माग गरेका हुन् ।

सुनचाँदी महासंघका अध्यक्ष माणिरत्न शाक्यले सरकारले सधैंका लागि कोटा सिस्टम हटाउन माग गरे । कुनै परिस्थितिवस लगाएको कोटा प्रणाली नहटाउँदै उपभोक्ताले सुनमा महंगोमा खरिद गर्नुपर्ने र समयमा नपाउने अवस्था झेल्नुपर्ने बताए । कुनै समस्या समाधानका लागि मात्र कोटा प्रणाली लागू गर्न मिल्ने बताए ।

‘कोटा भनेको कुनै कारण विशेषले तोक्ने कुरा आउँछ, तर सरकारले एकपटक लगाएको कोटा सधैं राखिराख्दा समस्या बनेको छ’ अध्यक्ष शाक्यले भने, ‘कोटा स्सिटमले सुन चाँदीका व्यवसायी र, कर्मचारी तथा हस्ताकलामा काम गर्ने कालीगढहरुको रोजगार सुरक्षित हुने गरी व्यवस्था हुनुपर्छ ।’

आयात कम हुने र माग बढी हुने अवस्था बजारमा देखिएको उनको भनाइ छ । एकपटकका लगाइएकाे काेटा सधैंका लागि राख्नु सही नहुने बताए ।