माइक्रो बसको ठक्करबाट पैदलयात्रीको मृत्युपछि कैलालीमा पूर्व-पश्चिम राजमार्ग अवरूद्ध

११ फागुन, धनगढी । कैलालीमा माइक्रो बसको ठक्करबाट पैदल यात्रीको मृत्यु भएको घटनाको विरोधमा पीडित र आफन्तले यहाँको पूर्वपश्चिम राजमार्ग क्षेत्र बन्द गराएका छन् ।

आज बिहान गोदावरी नगरपालिका–९ बल्मीमा बा ५ ख ४०३२ नम्बरको माइक्रो बसले ठक्कर दिदा पैदल यात्री गौरीगंगा नगरपालिका–६बस्ने ६० वर्षीया गेरुवा चौधरीको घटनास्थलमै मृत्यु भएको छ ।

चौधरीलाई ठक्कर दिने नेपालगञ्जबाट अत्तरियातर्फ आउँदै गरेको उक्त माइक्रो बस र चालक बाँकेको कोहलपुरका २९ वर्षीय नविन सिंहलाई इलाका प्रहरी कार्यालय मालाखेतीले नियन्त्रणमा लिएको छ ।

घटनाको विरोधमा स्थानीयले बचि सडकमा टायर बालेर पूर्वपश्चिम राजमार्ग अवरुद्ध गरेका छन् । राजमार्गमा अवरोध सिर्जना भएपछि विभिन्न गन्तव्यका लागि छुटेका सवारीसाधन बल्मीमा रोकिएका छन् ।

सडक खुलाउने प्रयास भइरहेको जिल्ला ट्राफिक प्रहरी कार्यालयका प्रमुख ट्राफिक प्रहरी निरीक्षक विरेन्द्र जोहारीले बताए । विरोध प्रदर्शन काबुबाहिर जान नदिन सदरमुकामबाट थप फोर्स माग गरिएको प्रहरीले जनाएको छ ।

प्रदर्शनमा स्थानीयले पनि साथ दिइरहेका छन् । उनीहरुले मृतक परिवारवारलाई उचित क्षतिपूर्ति र दोषी चालकलाई कडा कारबाही हुनुपर्ने माग गरेका छन् ।