साइबर सुरक्षासम्बन्धी कानूनबाट मात्र साइबर अपराध रोक्न संभव : संचारमन्त्री शर्मा

११ फागुन, काठमाडौं । संचार तथा सूचना प्रविधिमन्त्री रेखा शर्माले साइबर सुरक्षाका लागि लगानी बढाउन सरकार सदैव तयार रहेका बताएकी छन् । बिहीबार काठमाडौंमा आयोजित साइबर सुरक्षासम्बन्धी गोष्ठीमा बोल्दै मन्त्री शर्माले पछिल्लो चरणमा मुलुकभित्र साइबर सुरक्षामा खतरा बढ्दै गएको बताउँदै त्यसलाई रोक्न आवश्यक जनशक्ति निर्माणमा लगानी बढाउने योजना सरकारले बनाइरहेको बताइन् ।

उनले सरकारी कामकारबाहीलाई पेपरलेस बनाउने योजनामा सरकार अघि बढिसकेको र यसमा दक्ष जनशक्तिको खाँचो पूर्ति गर्नतिर संचार मन्त्रालय कार्ययोजनासहित लागिसकेको जानकारी दिइन् । सूचना सेवालाई फाइभ जीमा पुर्याउने उनको भनाइ छ ।

अहिले सरकारी डाटामा पटकपटक भइरहेको ह्याकिङ र सूचना प्रविधिको प्रयोगका क्रममा सामाजिक संजालमा रहेका नागरिक तहमा हुने गरिएको साइबर बुलिङ तथा फिक्सिङले सरकारलाई गम्भीर तुल्याएको बताइन् । साइबर सुरक्षाका लागि बलियो कानून बनाउन सरकार लागिसकेको बताउँदै सूचना प्रविधिको उच्चतम् विकास गरेर संभावित ठूल्ठूला घटना सक्ने साइबर अपराधलाई रोक्न कानून बनाउने काम भइरहेको बताइन् ।

साथै उनले विद्यमान कानूनको आधारमा सरकारी कार्यालयहरुमा विद्युतीय हस्ताक्षरसम्बन्धी व्यवस्थाबमोजिम सरकारी निकायहरुमा अभिलेखहरुको सम्प्रेषण, प्राप्ति र स्वीकारलाई सहज र सुरक्षित बनाएको उल्लेख गर्दै साइबर सुरक्षाका लागि मन्त्रालयमा सेक्यूरिटी अपरेसन सेन्टर संचालनमा ल्याइएको जानकारी दिइन् ।