राष्ट्रपतिबारे छलफल गर्न सिंहदरबारमा ३ दलको बैठक जारी

११ फागुन, काठमाडौं । राष्ट्रपति उम्मेदवारबारे विषयमा छलफल गर्न तीन दलको बैठक सिंहदरबारमा सुरु भएको छ । बैठकमा नेकपा माओवादी केन्द्र, नेकपा एकीकृत समाजवादी र जनता समाजवादी पार्टीका शीर्षस्थ नेताहरुको उपस्थितिमा बैठक जारी छ ।

बैठकमा माओवादीबाट प्रधानमन्त्री तथा पार्टी अध्यक्ष पुष्पकमल दाहाल प्रचण्ड, नेताहरू नारायणकाजी श्रेष्ठ, जनार्दन शर्मा र शक्ति बस्नेत सहभागी रहेका छन् ।

यस्तै एकीकृत समाजवादीबाट अध्यक्ष माधवकुमार नेपाल, नेताहरू बेदुराम भुसाल, घनश्याम भुसाल र प्रमेश हमाल छन् भने जसपाबाट अध्यक्ष उपेन्द्र यादव र नेता राजेन्द्र श्रेष्ठ सहभागी छन् ।

यही फागुन २५ गते हुने राष्ट्रपति निर्वाचनका लागि आउँदो शनिबार उम्मेदवारी दर्ताको तालिका छ । जसपाबाहेक कुनैपनि दलले उम्मेदवार टुंग्याउन सकेका छैनन् । उम्मेदवारलाई लिएर दलहरुको बीचमा गठबन्धन भत्किने र बन्नेसम्मको संभावना खेल चलिरहेको छ ।

यो बैठक सकेर आजै नेपाली कांग्रेससहित ४ दलका शीर्ष नेताहरुबीच बैठक बस्ने भनिएकामा उक्त बैठक स्थगित गरिएको छ । स्थगित बैठक भोलि बस्ने बताइएको छ ।