विदेशी तरकारीलाई प्रतिबन्ध लगाउनुकाे विकल्प छैन : विप्लव

१२ फागुन, काठमाडौं । नेपाल कम्युनिस्ट पार्टी (नेकपा)का महासचिव नेत्रविक्रम चन्द ‘विप्लव’ले आत्मनिर्भरताको सिद्धान्तले मात्र मुलुकलाई स्वाधीन बनाउने बताएका छन् । पार्टीनिकट बिहीबार लुम्बिनीमा भएकाे अखिल नेपाल किसान महासंघ (क्रान्तिकारी)को दाेस्राे पूर्ण बैठकलाई सम्बोधन गर्दै महासचिव विप्लवले धारणा राखेका हुन् ।

किसानलाई बलियाे बनाउन विदेशी कृषिजन्य वस्तुलाइ प्रतिबन्ध लगाउनुकाे विकल्प नरहेकाे उनकाे धारणा थियाे । वर्तमान राजनीतिक संकटको सामधान क्रान्तिकारी परिवर्तनबाट मात्र संभव रहेको बताउँदै किसानले उत्पादन बढाएर भारतबाट आउने तरकारीलाई बन्देज लगाउनु पर्ने बताए । किसानले समाजवादी व्यवस्था स्थापनाका लागि निरन्तर लड्नुपर्ने बताउँदै समाजवादमा जोकोही पनि हाकिम नभइ किसान भएर जानुपर्ने नीति हुने बताए ।

पार्टीले लिएको कार्यक्रम एकीकृत जनक्रान्तिबाट जनताले नेतालाई र नेताले जनतालाई नजिकबाट चिन्ने व्यवस्था स्थापना गरिने उनको भनाइ थियो । उनले पार्टीले अपनाएको विकास प्रणालीमा नेताले जनतालाई उत्पादन गर्ने तरिका सिकाउने र उत्पादित वस्तुको बजारीकरणमा बिचौलियालाई निषेध गर्न किसानलाई प्रशिक्षित गर्ने नीति लिएकाे बताए ।

उनले पार्टीका नेता कार्यकर्ताले आफैंले उत्पादन गरेर आफ्नै मेहनत खाइरहेको बताए । ‘आफ्नै मेहनत खाएर दलाल पुँजीवादी सत्ता पल्टाउन क्रान्तिलाई अगाडि बढाउनुपर्ने बताए । बैठकबाट महासंघले कृषिप्रधान देश मानिएको नेपालमा विदेशी कृषि उत्पादनको निर्वाध आयातलाई रोक्न स्वदेशी कृषिजन्य वस्तु र कृषिजन्य उत्पादनलाई प्रवर्द्धन गरेर राष्ट्रिय अर्थतन्त्र विकासका लागि संघर्ष चलाउने निर्णय गरेको छ ।

उच्च कृषि प्रविधि र ठूलो पुँजी लगानीमा आधारित भारत लगायत विभिन्न मुलुकमा हुने उच्च स्तरकाे उत्पादकत्वले परम्परागत औजार, मेशिन र कृषि प्रणालीबाट भइरहेकाे नेपाली वस्तुले नेपाली बजारमा प्रतिस्पर्धा गर्नुपर्ने बाध्यात्मक राज्यकाे नीतिका कारण ऋणमा परेका किसान हातमुख जाेडने र बाँच्न नसक्ने अवस्थाबाट आत्महत्या र आत्मदाहकाे अवस्थामा पुगेकाे बैठककाे निष्कर्ष छ ।

विदेशी वस्तुकाे खुलेआम आयातले नेपाली कृषि प्रणाली ध्वस्त हुँदै गएकाे भन्दै महासंघले नेपाली किसानकाे लगानी र जीवन रक्षाका लागि परनिर्भरतामा आधारित नीतिविरुद्धकाे संघर्षमा सामेल हुन आह्वान गरेको छ ।

ऋण काढेर उत्पादन गर्दा समेत राज्यकाे परनिर्भमुखी गलत नीतिकाे मारमा परी लगानी जाेगाउन र दैनिकी गुजरा चलाउन नसकेर सडकमा तरकारी फ्याक्ने मात्र नभइ  ज्यानै फाल्नुपर्ने अवस्थामा कृषकलाई पुर्याउने सरकारकाे नीति खारेज गराउन आन्दाेलनमा सहभागी हुन समेत अपिल गरिएकाे छ ।