यू-१९ विश्वकप एसिया क्षेत्र छनोट खेलमा राष्ट्रिय टिमका लागि आकाशको अर्धशतक

१२ फागुन, काठमाडौं । आइसीसी यू–१९ विश्वकप एसिया क्षेत्र छनोट खेलमा सिंगापुरविरुद्ध नेपाली टिमबाट आकाश त्रिपाठीले अर्धशतक पूरा गरेका छन् ।

युएईमा चलिरहेको छनोट प्रतियोगितामा आकाशले यू–१९ राष्ट्रिय टिमबाट डेब्यु गरेका आकाशले १०० बल खेल्दै ७ चौका एक छक्काको मद्दतमा ७८ रन बनाएर आउट भएका छन् ।

घरेलु क्रिकेटमा २०२२ को यू–१९ प्रतियोगितामा लुम्बिनी प्रदेशबाट खेल्दै आएका आकाशले नेपालका लागि डेब्यू क्षणमै अब्बल प्रदर्शन गरेका हुन् । नेपालले ४० ओभरको खेल सकिँदा ४ विकेट गुमाएर १९१ रन बनाएको छ ।

युएईको आजमानमा रहेको इर्डेन गार्डेन ओभलमा टस जितेर पहिला ब्याटिङको रोजेको नेपालका लागि ७ जना खेलाडीले डेब्यु गरेका छन् । आकाश सहित दीपक बोहरा, सुवास भण्डारी, हेमन्त धामी, दिपकप्रसाद डुम्रे, दीपक बोहरा र मिलन बोहराले डेब्यु गरे ।

प्रतियोगितामा नेपाल, हङकङ, मलेसिया, सिंगापुर, युएई र कुवेत छन् । जारी प्रतियाेगिता चैत २ गतेसम्म चल्नेछ । प्रतियाेगिता विजेताले २०२४ मा श्रीलंकामा हुने यू–१९ विश्वकप खेल्न पाउनेछ ।