मानसिक समस्याका कारण प्रेम आचार्यले आत्मदाह गरेको मनोचिकित्सकको दाबी

१४ फागुन, भक्तपुर । गत माघ १० गते दिउँसाे नयाँंबानेश्वरस्थित संसद् भवन अगाडि आफ्नो शरीरमा पेट्रोल छर्केर आगो लगाई आत्मदाह गरेका इलामका प्रेमप्रसाद आचार्यले आत्मदाह गर्नुको कारण मानसिक रोग भएको चिकित्सकले दाबी गरेका छन् ।

जिल्ला स्वास्थ्य कार्यालय कटुञ्जेले आत्महत्या, रोकथाम तथा न्युनीकरण विषयमा सरोकारवालाहरुसँंग गरेको छलफलमा मनोचिकित्सक डा. दुर्गा थापाले यदि समयमै त्यसको उपचार गरेको भए, त्यो अवस्था नआउने बताइन् । ‘त्यसकारण मानसिक रोगलाई बेवास्ता गर्न मिल्दैन’ उनले भनिन्, ‘मानसिक रोग उपचार गरे निको हुन्छ ।’

शारीरिक रोग जस्तै मानसिक स्वास्थ्य समस्यालाई पनि गम्भीर रूपमा लिएर बेलै उपचारको बाटो अपनाउनुपर्ने उनले बताइन् ।

‘औषधिको सेवन, मनोपरामर्श तथा पुनर्स्थापनाजस्ता उपचार विधिद्वारा यो रोगको उपचार सम्भव छ’ उनले भनिन्, ‘मानसिक रोग, आत्महत्याप्रतिको गलत धारणालाई हटाउन यस विषयमा चेतनामूलक कार्यक्रम सञ्चालन गर्नुपर्छ । यस विषयमा अभियान नै सञ्चालन गर्नु जरुरी देखिन्छ ।’