राप्रपाले प्रदेश १ मा सरकार छाडेन, ‘पर्खने र हेर्ने’ रणनीतिमा

१४ फागुन, माेरङ । केन्द्रमा सरकारबाट बाहिरिएकाे राप्रपाले तत्काल प्रदेश १ मा भने तत्काल सरकार नछाड्ने भएको छ ।

राष्ट्रपति निर्वाचनका लागि नयाँ राजनीतिक समिकरण बनेपछि राप्रपाले संघ र प्रदेश सरकारबाट बाहिरिने निर्णय गरेको थियो । सोही निर्णयका आधारमा संघ र बागमती प्रदेशबाट राप्रपा बाहिरिइसकेको छ । तर प्रदेश १ मा भने सरकारबाट बाहिरिइसकेकाे छैन ।

राप्रपा प्रदेश १ संसदीय दलका नेता समेत रहेका उद्योग कृषि तथा सहकारी मन्त्री भक्ति सिटौलाले सरकार छाड्नेबारे  पार्टी नेतृत्वबाट निर्देशन आइनकेकाे बताए । नेतृत्वसँग छलफल गरेपछि मात्र सरकारबारे के गर्ने भन्ने निर्णय गर्ने बताए । अन्य प्रदेशको तुलनामा प्रदेश १ को परिस्थिति फरक रहेका कारण छलफलपछि निर्णयमा पुगिने उनले बताए ।

अन्य प्रदेशको तुलनामा प्रदेश १ विशिष्ट परिस्थिति रहेकाे उनकाे भनाइ छ । प्रदेश सरकारमा रहने वा बाहिरिने भन्ने विषयमा छलफल गर्न पार्टीको प्रदेश समितिले बैठक बोलाएको उनले बताए ।

राप्रपा केन्द्रीय कार्यसम्पादन समितिको शनिबारको बैठकले लिएकाे निर्णयअनुसार राप्रपाबाट संघीय सरकारमा उपप्रधान तथा उर्जामन्त्री रहेका राजेन्द्र लिङ्देनसहित मन्त्रीहरुले शनिबार नै प्रधानमन्त्रीसमक्ष राजीनामा बुझाइसकेका छन् । प्रदेश १ अध्यक्ष लिङदेनकाे गृह जिल्ला भएकाे क्षेत्र पनि हाे ।

एमालेका हिक्मतकुमार कार्की नेतृत्वको प्रदेश १ सरकारमा राप्रपाबाट सिटौला मन्त्री भएका थिए । केन्द्र सरकारबाट एमाले बाहिरिइनसकेकाेअवस्था छ । उसले राष्ट्रपति निर्वाचनकाे परिणामपछि मात्र निर्णय लिने बताएकाे छ ।

९३ सदस्यीय प्रदेशसभामा सामान्य बहुमतका लागि ४७ मत आवश्यक पर्छ । प्रदेशमा नेकपा एमालेको सहयोगमा प्रत्यक्ष तर्फ दुई सिट जितेको राप्रपा एमालेसँग नजिक छ । एमाले र राप्रपा एक ठाउँमा उभिए ४६ मत पुग्छ । कांग्रेस माओवादी केन्द्र, एकिकृत समाजवादी र जसपाको गठबन्धनको मत पनि (सभामुख बाहेक) ४६ मात्र पुग्छ ।

प्रदेशमा माओवादी केन्द्र सरकारबाट बाहिरिएको छैन । प्रदेश १ प्रदेशसभामा एमालेका ४०, प्रदेशसभामा कांग्रेसका २९, माओवादी केन्द्रका १३, राप्रपाका ६,नेकपा एकीकृत समाजवादीका ४ र जसपाका १ सांसद छन् ।