जेल बसेको १ वर्षपछि निर्दोष ठहर भएका अभिनेता पल शाह रिहा

१५ फागुन, तनहुँ । एक नाबालिकामाथि बलात्कार गरेको आरोपमा मुद्दा पुर्पक्षका लागि एक वर्षदेखि तनहुँ जेलमा रहेका पल शाह अभिनेता ‘पूर्णविक्रम शाह’ अर्थात  सोमबार रिहा भएका छन् । जिल्ला अदालत नवलपुरले नाबालिकामाथि यौन दूर्व्यवहार कसुरमा दाेषी ठहर गरी उनलाई मुद्दा पुर्पक्षका लागि जेल चलान गरेको थियो ।

जिल्ला अदालतको आदेश बदरको माग गर्दै उच्च अदालत पोखरामा दिएको रिट निवेदनमाथि सुनुवाइ गर्दै आइतबार उच्चले निर्दोष ठहर गर्दै उनलाई तत्काल जेलमुक्त (थुनुवामुक्त) गर्न आदेश दिएको थियो । रिहाई आदेशको भोलिपल्ट उनी तनहुँ कारागारबाट आज बिहान रिहा भएका हुन् । उनलाई तनहुँ जिल्लामा भएको अर्को एक किशोरीमाथि बलात्कारको मुद्दामा उनले गएको माघ २ गते नै सफाइ पाइसकेका थिए ।

उनीविरुद्ध सुरुमा तनहुँ र दोस्रोमा नवलपुर जिल्ला अदालतमा बलात्कारको मुद्दा परेको थियो । सुरुमा उनलाई तनहुँ प्रहरीले पक्राउ मुद्दा चलाएको थियो । सो मुद्दामा उनलाई जिल्ला अदालत तनहूँले पुर्पक्षका लागि जेल पठाउन आदेश दिएको थियो । सो आदेशविरुद्ध उनले पोखरा उच्चमा गरेको पुनरावेदन रिटमा भएको सुनुवाईपछि माघ २ मा सफाइ दिइएको थियो ।

तर नवलपुरको आदेशलाई उनलाई बलात्कार कसुरमा नभई बलात्कारको आशयले यौन दुव्र्यवहार गरेको कसुरमा ठहर गरेर २ वर्ष कैद र पीडितलाई १० रुपैयाँ क्षतिपूर्ति भराउने आदेश दिएका कारण उनी तनहूँ जेलमा रहँदै आएको बेला सो आदेशको बदरको माग गर्दै पोखरा उच्चमा दिएको पुनरावेदन रिटमाथि संयुक्त इजलासमा सुनुवाइपश्चात निर्दोष ठहरको फैसला भएको थियो । सोही अनुरुप उनी रिहा भएका हुन् ।