दुषित खानेकुरा खुवाउने सिंहदरबारभित्रका क्यान्टिन संचालक भट्टराईलाई ३ लाख जरिवाना

१५ फागुन, काठमाडाैं । मुलुकभित्र सुशासन कायम गर्ने, नागरिकलाई स्वच्छ खानेकुरा खुवाउने र गलत नियतले दुषित वा कुहिएको खानेकुराको अनुगमन तथा त्यस्ता वस्तु खुवाउनेमाथि कारबाहीको जिम्मेवारी पाएर थुप्रै मन्त्रालयको मुख्यालय रहेका मुख्य प्रशासनिक केन्द्र सिंहदरबारभित्र दुषित खानेकुरा खुवाउने धन्दा चल्दाेरहेछ भन्दा पत्यार नलाग्न सक्छ, तर सत्य घटना यही भएको छ । र, दुषित खानेकुरा खुवाउने सिंहदरबारभित्र रहेको केन्द्रीय क्यान्टिनका संचालकमाथि जरिवाना कारबाही गरेको छ ।

सिंहदरबारभित्र संचालित केन्द्रीय क्यान्टिनमा चलाइने खानेकुरामाथि अनुगमन र परीक्षणका क्रममा दोषी पाइएपछि वाणिज्य, आपूर्ति तथा उपभोक्ता संरक्षण विभागले जरिवाना कारबाही गरेको छ ।

आइतबार गरेको अनुगमनमा क्यान्टिनमा खानयोग्य अवधि सकिएका र म्याद सकिएका मसला तथा दुग्धजन्य पदार्थ भेटिएको थियो । विभागका बजार निरीक्षण अधिकृत टोलीले अनुगमन गर्दा क्यान्टिनमा दुर्गन्धित मासु, तरकारी र दूधजन्य वस्तु फेला परेको र खान योग्य नभएका सबै चिजबिज तत्काल नष्ट गरिएको थियो ।

अनुगमनबाट क्यान्टिन संचालकले अखाद्यय (खान नमिल्ने) खानेकुरा खुवाएर उपभोक्ताको स्वास्थ्यमा गम्भीर खेलवाड गरेको निष्कर्षसहित विभागले क्यान्टिन सञ्चालन गर्ने कञ्चन चमेना गृहका उत्तम भट्टराईलाई ३ लाख रुपैयाँ जरिवाना गरेको छ ।