छवि ओझासँगको सम्बन्धविच्छेदसँगै शिल्पाले पाइन् अंशको अधिकार

१५ फागुन, काठमाडौं । अभिनेत्री शिल्पा पोखरेलले फिल्म निर्माता छविराज ओझासँग औपचारिक रुपमा सम्बन्ध विच्छेद पाएकी छन् । दुई जनाबीच ३ वर्ष पुरानो मुद्दामा काठमाडौं जिल्ला अदालतले आइतबार सुनुवाइ गर्दै अंशबण्डासहित सम्बन्धविच्छेद गर्ने फैसला सुनाएको छ ।

न्यायाधीश शंकरप्रसाद राईको एकल इजलासले अंशबण्डा नभएसम्म शिल्पालाई मानापाथी भर्न समेत ओझाको नाममा आदेश दिएको छ । तर अदालतले छविकी जेठी पत्नी हेमा ओझाले दायर गरेको बहुविवाहको मुद्दा र छोरा साकार सुनारलाई प्रतिवादी बनाउँदै उमा सुनारले दायर गरेको धर्मपुत्रबारेको मुद्दालाई इजलासले खारेज गरिदिएको छ । इजलासले शिल्पाको उजुरीमा दाबी पुग्ने फैसला सुनाएको हो ।

आदेशानुसार अब छविको आधा सम्पत्तिमा शिल्पाको दाबी लाग्नेछ । दाबी बमोजिम अंशबण्डा लिएर सम्बन्धविच्छेद गरी उनले अलग बस्न पाउनेछिन् । तर अंशबण्डा नहुन्जेलसम्म छविले शिल्पालाई मासिक रुपमा मानाचामल (लाग्ने खर्च) भर्नुपर्नेछ । शिल्पाको तर्फबाट बहस गरेका कानुन व्यवसायी रमेशप्रसाद गुरागाईंले आफ्नो पक्षले न्याय पाएको र न्याय दिलाउन सफल भएको बताए ।

अविवाहित भएकै बेला शिल्पाले जेठी श्रमिती भएकै बेला छबिसँग विवाह गरेकी थिइन् । त्यसपछि जेठी श्रीमती हेमाले दुई जनाविरुद्ध बहविवाहको मुद्दा हालेकी थिइन् । मुद्दा परेपछि दुवै जना फरार भएपनि पछि छबि हेमासँगै बसेको र शिल्पालाई बेवास्ता गर्दै आइरहेका थिए ।

अदालतको आदेशपछि शिल्पाले अधिकार दिलाउन सहयोग पुर्याउने र न्यायका लागि लडने कानून व्यवसायीहरु गुरागाँई र मनोज यदावलाई धन्यवाद दिएकी छन् ।

उनले समाजिक संजालमा लेखेकी छिन्, “हिजो सम्मानित काठमाडौं जिल्ला अदालतबाट छवि ओझा बिरुद्धको मेरो मुद्धामा मलाइ जिताउने सम्पुर्ण निर्णयले मैले सम्मानित अदालतबाट न्याय पायेको महसुस गरेको छु। यस कठिन समयमा मलाइ बलियो साथ दिने सबै परिवारजन, आमा, बुवा, दाई, भाउजू,साथीहरु, संघ संस्था तथा विशेष सहयोगको लागि वरिष्ठ अधिवक्ता रमेश गुरागाइज्यु र अधिवक्ता मनोज यादवज्युलाई कृतज्ञता तथा हार्दिक धन्यवाद ब्यक्त गर्न चाहन्छु ।’