खानेपानीमा राजनीति नगर्न कर्मचारीलाई मन्त्री खानको चेतावनी

१५ फागुन, काठमाडौं । खानेपानी मन्त्री अब्दुल खानले खानेपानीमा राजनीति नगर्न संस्थानका कर्मचारीहरुलाई चेतावनी दिएका छन् । सोमबार काठमाडौंमा आयोजित नेपाल खानेपानी संस्थानको ३४औं वार्षिकोत्सव समारोहलाई सम्बोधन गर्दै मन्त्री खानले संस्थानलाई राजनीतिक अखडा बनाउने र उपभोक्तालाई दुःख दिने काम सह्य नहुने चेतावनी दिए ।

खानेपानी संस्थान आम सर्वसाधारणलाई स्वच्छ र सफा खानेपानी वितरणका लागि निर्माण भएकाले त्यसलाई राजनीतिक अखडा बनाउने काम नगर्न उनले चेतावनी दिए । उनले राजनीति गर्ने भए मैदानमा आउनुपर्ने बताए । खानेपानीका लागि बजेट नछुट्याए आफैं त्यसको नेतृत्व गरेर प्रधानमन्त्री र अर्थमन्त्रीको कार्यालयमा घेर्न जाने उनको भनाइ थियो ।