फागुन १९ मा ८ दलले प्रदेश सांसदहरुको भेला गर्ने

१५ फागुन, काठमाडौं । हालै गठन भएको नेपाली कांग्रेस, माओवादी केन्द्रसहितका ८ राजनीतिक दलले यही फागुन १९ गते प्रदेश सांसदहरुको भेला गर्ने भएका छन् ।

राष्ट्रपति चुनावमा एक ठाउँमा रहेका कांग्रेस, माओवादी केन्द्र, एकीकृत समाजवादी, जनता समाजवादी पार्टी, जनमत पार्टी, नागरिक उन्मुक्ति पार्टी र राष्ट्रिय जनमोर्चाले प्रदेश सांसदहरुको भेला बोलाएका हुन् ।

आज बसेको ८ दलीय गठबन्धनको कार्यदलको बैठकले राष्ट्रपति निर्वाचन प्रचार प्रसारलाई बल पुर्याउने उद्देश्यले भेलाको आयोजना गर्ने भएका हुन् । कांग्रेस उपसभापति समेत रहेका कार्यदलका संयोजक पूर्णबहादुर खड्काले कार्यदलको बैठकले सांसदहरुको भेला बोलाउने निर्णय गरेको बताए ।

गठबन्धनबाट कांग्रेसका वरिष्ठ नेता रामचन्द्र पौडेललाई राष्ट्रपति पदमा उम्मेदवार बनाइएको छ । एमालेबाट पार्टी उपाध्यक्ष सुवासचन्द्र नेम्वाङले उक्त पदका लागि उम्मेदवार दिएका छन् । नयाँ राष्ट्रपति चयनका लागि मतदान फागुन २५ मा हुँदैछ ।