विप्लव नेतृत्वको नेकपासहित ४ पार्टीले बनाए कार्यदल

१५ फागुन, काठमाडौं । नेत्रविक्रम चन्द ‘विप्लव’ नेतृत्वको नेकपासहित ४ पार्टीले संयुक्त मोर्चाको स्वरुप र कार्यक्रम तय गर्न कार्यदल गठन गरेका छन् । सोमबार काठमाडौंमा बसेको बैठकले नेकपा, आहुती नेतृत्वको बैज्ञानिक समाजवादी कम्युनिस्ट पार्टी नेपाल, कर्णजीत बुढा नेतृत्वको नेकपा (माओवादी समाजवादी) र ऋषि कट्टेल नेतृत्वको नेकपाबीच आगामी राजनीतिक कार्यक्रम र संघर्षका लागि संयुक्त मोर्चा गठन गर्न र संघर्षका कार्यक्रम बनाउन कार्यदल गठन गरेको हो ।

कार्यदलमा संयोजक तोकिएको छैन । संयोजक को बन्ने भन्नेमा सहमत हुन नसकेपछि चारै पार्टीबाट एक एक जना रहने गरी कार्यदल गठन भएको छ । कार्यदलमा विप्लव नेकपाबाट प्रकाण्ड, आहुतीको तर्फबाट जागृत रायमाझी, कर्णजीतको तर्फबाट कणैजीत स्वयम्, कट्टेलको तर्फबाट आरबी भण्डारी रहेका छन् ।

यसअघि यी पार्टीहरुबीच पार्टी एकताकै लागि प्रयास भएपनि त्यो संभव नभएपछि मोर्चा बनाएर संयुक्त रुपमा राजनीतिक कार्यक्रम अगाडि बढाउन लागिपरेका छन् ।