सर्वोच्चले दियो सन्दीप लामिछानेलाई विदेश जाने अनुमति

१५ फागुन, काठमाडौं । सर्वोच्च अदालतले क्रिकेटर सन्दीप लामिछानेलाई विदेश जाने बाटो खुला गरिदिएको छ । यसअघि उच्च अदालत पाटनले काठमाडौं जिल्ला अदालतको आदेशलाई बदर गरेर विदेश जान गरेको बन्देज आदेशलाई सर्वोच्चले सोमबार सदर गर्दै विदेश जाने बाटो खुला गरिदिएको हो ।

सर्वोच्चका न्यायाधीशद्वय सपना प्रधान मल्ल र कुमार चुडालको संयुक्त इजलासले सन्दीलाई विदेश जान रोक लगाउनुपर्ने मनासिव आधार र प्रमाण नदेखिएको भन्दै बाटो खोलिदिएको हो ।

आदेशसँगै सन्दीपले यूएईमा जारी आईसीसी विश्वकप क्रिकेट लिग–२ अन्तर्गत पपुवा न्यू यूगिनी, यूएई र नेपालीबीचको त्रिकोणात्मक सिरिज खेल्न जाने बाटो खुलेको छ । उच्चले दिएको आदेशले उनको विदेश यात्रा रोकिएको थियो । सो आदेश बदरको माग गर्दै उनले यही फागुन ११ गते सर्वोच्चमा रिट निवदेन दिएका थिए ।

रिटमाथि आइतबार र सोमबार दुई दिनको सुनुवाइपछि संयुक्त इजलासले विदेश यात्रामा बन्देज लगाउनु नपर्ने आदेश दिएको हो । सर्वोच्चको यो आदेश सन्दीपलाई गत पुष २७ मा उच्चले विदेश जान रोक लगाउँदै काठमाडौं जिल्ला अदालतको आदेश बदरसहित २० लाख रुपैयााँ धरौटीमा जेलमुक्त गरेको थियो ।

बलात्कार जस्तो जघन्य अपराध कसुरमा अभियुक्तलाई मुद्दाको अन्तिम टुंगो नलागुञ्जेल थुनामा राख्नुपर्ने उल्लेख गर्दै काठमाडौं जिल्ला अदालतले मंसिरमा सन्दीपलाई जेल पठाएको थियो । तर उक्त आदेशविरुद्ध सन्दीप उच्च पुगेका थिए । उच्चले उनलाई विदेश जान नपाउने, काठमाडौं उपत्यका छाडन प्रहरीको अनुमति लिनुपर्ने, पीडितका परिवारसँग भेट गर्न नपाइनेलगायत विभिन्न सर्तसहित धरौटीमा रिहाइ गरेको थियो । सन्दीपविरुद्ध काठमाडौं जिल्ला अदालतमा नाबालिग बलात्कार कसुरमा मुद्दा चलिरहेको छ ।