भारतीय कम्पनी सेभेन थ्री स्पोर्टससँग सम्झौता रद्द गर्ने क्यानको निर्णय

१५ फागुन, सुर्खेत । नेपाल क्रिकेट संघ क्यानको साधारण सभाले नेपाल टी–२० लिग आयोजनाका लागि भारतीय कम्पनी सेभेन थ्री स्पोर्टससँगको सम्झौता रद्द गर्ने निर्णय गरेको छ ।

सुर्खेतको विरेन्द्रनगरमा आइतबार र सोमबार भएको साधारण सभाले सेभेन थ्री स्टारसँगबाट पाउनु पर्ने रकम २ करोड ९५ लाख रुपैयाँ फिर्ता लिएर सम्झौता रद्द गर्ने निर्णय गरेको नेपाल क्रिकेट संघ क्यानका कार्यवाहक सचिव दुर्गाराज पाठकले बाए ।

सम्झौता अनुसार पहिलो सिजन आयोजनाको लाइसेन्स फीमार्फत क्यानले ३ करोड ९० लाख रुपैयाँ पाउनु पर्नेमा अहिलेसम्म २ करोड २० लाख रुपैयाँ मात्र पाएको उनले बताए ।

लाइसेन्स फीको १ करोड ७० लाख र पुरस्कार रकम १ करोड २५ लाख गरी क्यानले सेभेन थ्रीसँग २ करोड ९५ लाख रुपैयाँ लिन बाँकी छ ।
प्रतियोगिताको मुख्य साझेदार कम्पनी सेभेन थ्री स्पोर्टस नै लाइभ बेटिङ र स्पट फिक्सिङमा संग्लग्न रहेको पाइएपछि नेपाल टी(२० लिग विवादमा परेको थियो । सुरुमा नै प्रतियोगिता विवादमा परेपछि जतिन अहुवालिया सम्पर्क विहीन भएका थिए ।

क्यानले सेभेन थ्री स्पोर्टससँग ८ वर्षका लागि नेपाल टी–२० लिगको व्यापारिक र रणनीतिक साझेदारी सम्झौता गरेको थियो । रकम फिर्ता गराउने प्रक्रिया अघि बढाउन बोर्डलाई अधिकार दिएको छ ।

नेपाल टी–२० लिगको पहिलो सिजनको रकम दिन बाँकी रहेपनि सेभेन थ्री स्पोर्टसले माघमा क्यान र राखपलाई पत्र लेखेर एकतर्फी रुपमा सम्झौता रद्द गरेको थियो ।