सरकारबाट नबाहिरिने जनमत अध्यक्ष राउतको स्पष्टाेक्ति

१६ फागुन, काठमाडौं । जनमत पार्टीका अध्यक्ष डा. चन्द्रकान्त (सिके) राउतले आफू नेतृत्वकेा पार्टी सरकारबाट नबाहिरिने स्पष्ट पारेका छन् । मंगलबार काठमाडौंमा आयोजित विद्यार्थी संघको केन्द्रीय समितिको बैठकमा प्रशिक्षणमूलक मन्तव्य राख्ने क्रममा उनले यस्तो बताएका हुन् । सो कुरा उनले कार्यक्रमपछि बाहिरिने क्रममा सञ्चारकर्मीसँग बताए ।

अहिले सरकारबाट बाहिरिनुपर्ने कुनै परिस्थिति नरहेको उनको भनाइ छ । ‘अरु पार्टीहरु त माग पूरा भएनन् होला, कसैलाई राष्ट्रपति वा मन्त्रालय भएनन् होला’ उनले भने, ‘जनमत पार्टीको लागि कुनै त्यस्तो कुनै नयाँ परिस्थिति सिर्जना भएको छैन । त्यही भएर जनमत पार्टी सरकारमै रहन्छ ।’

नागरिकता विधेयक, राजबन्दीको रिहाइ र किसानका माग पूरा गर्नुपर्नेलगायतका आफ्नो पार्टीले उठाएको एजेण्डा सम्बोधन नहुने अवस्था आएमा सरकारलाई गरेको समर्थन फिर्ता हुनसक्ने उनले बताए । राष्ट्रपति उम्मेदवारबारे संचारकर्मीको प्रश्नमा उनले ‘सभामुख र राष्ट्रपति सकेसम्म एउटै दलको नहोस् भन्ने पक्षमा जनमत पार्टी रहेको बताए ।

माओवादी केन्द्रका अध्यक्ष प्रचण्डको नेतृत्वमा गत पुष १० गते गठन भएको सरकारमा जनमतसहित ७ पार्टीको समर्थन थियो । तर अहिले राष्ट्रपति निर्वाचनका लागि उम्मेदवाी दर्तासम्म आइपुग्दा एमाले, राप्रपा, सरकारलाई दिएको समर्थन फिर्ता लिएर सरकारबाट बाहिरिएका छन् भने रास्वपाले समर्थन चाहिं कायमै राखेको छ । अहिले सरकारमा माओवादी केन्द्र र जनमत पार्टी मात्र सहभागी छन् । जनमतले राष्ट्रपतिमा कांग्रेसका उम्मेदवार रामचन्द पौडेललाई समर्थन गर्ने भएको छ ।