प्रधानमन्त्रीलाई राष्ट्रपतिको पत्र, ‘बाँकी मन्त्रालय पनि आफै सम्हाल्नू’

१६ फागुन, काठमाडौं । राष्ट्रपति विद्यादेवी भण्डारीले प्रधानमन्त्री पुष्पकमल दाहाल ‘प्रचण्ड’लाई १६ मन्त्रालयको कार्यभरा सम्हाल्ने जिम्मेवारी दिएकी छन् । उनले नेकपा एमालेका मन्त्रीले राजीनामा दिएपछि रिक्त भएका थप आठ मन्त्रालयको कार्यभार पनि प्रधानमन्त्रीलाई दिएकी हुन् ।

राष्ट्रपति भण्डारीले मंगलबार थप आठ मन्त्रालयको कार्यभार प्रधानमन्त्री प्रचण्डलाई तोकेकी हुन । सोमबार बसेको एमालेको सचिवालय बैठकले सरकारबाट बाहिरिने र समर्थन पनि फिर्ता लिने निर्णय लिएपछि थप ८ मन्त्रालय मन्त्रीविहिन भएका थिए । अब प्रधानमन्त्रीसँग १६ मन्त्रालयको जिम्मेवारी आएको छ ।

एमालेले अर्थ, कृषि, उद्योग, भूमि व्यवस्था, स्वास्थ्य, रक्षा, परराष्ट्र र महिला तथा बालबालिका मन्त्रालय लिएकोमा मन्त्रीहरूलाई फिर्ता बोलाइसकेको थियो । उक्त मन्त्रालयको जिम्मा अहिले प्रधानमन्त्री प्रचण्डलाई आएको हो । यसअघि राष्ट्रिय प्रजातन्त्र पार्टी (राप्रपा)ले पनि सरकारबाट बाहिरिने निर्णय गरेको थियो । राप्रपाले ऊर्जा, सहरी विकास र कानून मन्त्रालय लिएकोमा मन्त्रीहरू फिर्ता भइसकेका छन् ।

रवि लामिछाने नेतृत्वको राष्ट्रिय स्वतन्त्र पार्टी पनि सरकारबाट बाहिरिइसकेको छ । लामिछानेको नागरिकता मुद्दामा सर्वोच्च अदालतले उनको सांसद पद बदर गरिदिएको थियो । त्यसपछि उनले गृहमन्त्रीबाट राजीनामा दिएका थिए । प्रधानमन्त्री प्रचण्डले गृह मन्त्रालयको पनि जिम्मेवारी सम्हाल्दै आएका छन्। साथै राष्ट्रिय स्वतन्त्र पार्टीले शिक्षा, विज्ञान तथा प्रविधि, श्रम, रोजगार तथा सामाजिक सुरक्षा मन्त्रालयबाट पनि मन्त्री फिर्ता बोलाएको थियो । रास्वपाले सरकारलाई दिएको समर्थन भने अझै कायमै राखेको छ ।

प्रधानमन्त्री प्रचण्डले गत माघ ३ गते मन्त्रिपरिषद विस्तार गर्दा वन तथा वातावरण मन्त्रालय र युवा तथा खेलकुद मन्त्रालय आफैंसँग राखेका थिए। जनता समाजवादी पार्टीलाई दिन भन्दै उक्त मन्त्रालय खालि राखिए पनि जसपा सरकारमा सहभागी नै भएको थिएन् । गत शुक्रबार राष्ट्रपति उम्मेदवारमा नेपाली कांग्रेसलाई सहयोग गर्ने ८ दलबीच सहमति बनेको थियो । गत पुस १० मा प्रचण्ड प्रधानमन्त्री नियुक्त हुँदा राष्ट्रपति एमालेलाई दिने समझदारी बनेको थियो । तर प्रचण्ड उक्त सहमतिबाट पछि हटेको भन्दै आज एमालेले सरकार छाडेको हो ।

राष्ट्रपति चुनावका लागि बनेको गठबन्धनमा रहेका दलहरूलाई समेटेर अब प्रधानमन्त्री प्रचण्डले मन्त्रिपरिषद विस्तार गर्ने तयारी िगरिरहेका छन् । यसबारे नेपाली कांग्रेसका सभापति शेरबहादुर देउवासँग छलफल चलिरहेको छ । प्रधानमन्त्रीले राष्ट्रपतिको निर्वाचन अगाडी नै मन्त्रिपरिषद विस्तार गर्ने सम्भावना छ । गत पुस २६ गते प्रचण्डलाई विश्वासको मत दिएकामध्ये एमाले र राप्रपाले सरकार छाडेका छन भने अब एक महिनाभित्र प्रधानमन्त्री दाहालले विश्वासको मत लिनुपर्ने संवैधानिक व्यवस्था छ ।