लुम्बिनीका मुख्यमन्त्री गिरि संकटमा, सरकारबाट समर्थन फिर्ता लिँदै साना दल

१६, फागुन, दाङ । केन्द्रमा राष्ट्रपति निर्वाचनलाई लिएर बनेको नयाँ राजनीतिक गठबन्धनले लुम्बिनी प्रदेश सरकार संकटमा परेको छ । लुम्बिनी सरकारका मुख्यमन्त्री एमालेका लिला गिरि छन् । उनी एमाले, माओवादी केन्द्र, नागरिक उन्मुक्ति पार्टी (नाउपा) लगायत दलहरुको समर्थनमा मुख्य मन्त्री बनेका थिए ।

४ सिट भएको नाउपाले भोलि समर्थन फिर्ता लिने भएको छ । उक्त पार्टीका संसदीय दलका नेता धर्मबहादुर चौधरीले आफ्नो पार्टीले भोलि बस्ने प्रदेशसभा बैठकमा सरकारलाई लिएको समर्थन फिर्ता लिने बताए । उनले नाउपाले राष्ट्रपतिमा कांग्रेसका उम्मेदवारलाई भोट हाल्ने बताए । नाउपा यसअघि एमालेसहितको गठबन्धनमा रहेको नाउपा कांग्रेससहित आवद्ध रहेर नयाँ बनेको गठबन्धनमा सहभागी छ । योसँगै नाउपाले एमालेबाट मुख्यमन्त्री बनेका गिरिलाई समर्थन निरन्तरता दिन नसकिने निर्णयमा पुगेको हो ।

यस्तै गिरिलाई समर्थन गरेको लोकतान्त्रिक समाजवादी पार्टी (लोसपा)ले पनि समर्थन फिर्ता लिने भएको छ । लोसपाको संसदीय दलका नेता सन्तोष पाण्डेयले पनि भोलि प्रदेशसभा बैठकबाट सरकारप्रतिको समर्थन फिर्ता लिने बताए । लोसपाको ३ सिट रहेको छ ।

माओवादी केन्द्र भने समर्थनबारे निर्णय लिन केन्द्रको बाटो हेरिरहेको छ । माओवादी केन्द्र संसदीय दलका नेता जोखबहादुर महराले भोलि बिहान बस्ने बैठकले निर्णय लिने बताए ।

लुम्बिनी प्रदेशसभामा ८७ सिटमध्ये बहुमतका लागि कम्तीमा ४४ सांसदको समर्थन चाहिन्छ । अहिले सबैभन्दा ठुलो दल एमालेसँग २९ सिट छ भने नेपाली कांग्रेसको २७, माओवादीको १०, राप्रपाको ४, नागरिक उन्मुक्तिको ४, जनमत पार्टीको ३ र जसपा र जसपाको ३÷३ सिट छ ।