प्रदेश १ को नाम ‘कोशी’ राख्ने प्रस्तावबाट कांग्रेस पछि हट्यो

१७ फागुन, काठमाडौं । प्रदेश १ को नाम कोशी राख्न सहमत भएको नेपाली कांग्रेस पछि हटेको छ । यसअघि एमालेसँग मिलेर कोशी नामका लागि संयुक्त रुपमा प्रस्ताव दर्ता गरेको कांग्रेसले प्रदेशसभा सचिवालयमा दर्ता प्रस्तावबाट समर्थन फिर्ता लिएको हो ।

प्रदेशसभा सचिवालयले तोकेकै समय आज बिहान एमालेका सांसद रामबहादुर राना मगर प्रस्तावक र एमालेकै निरन राई र नेपाली कांग्रेसका भूमिप्रसाद राजवंशी समर्थक रहेर कोशी नाम राख्ने प्रस्ताव संसदमा दर्ता गरिएकोा थियो ।

प्रस्ताव दर्ता भएको केही घन्टापछि कांग्रेसका राजवंशीले प्रदेशसभा सचिवालयमा आफ्नो समर्थन फिर्ता भएको जानकारसहित निवेदन दिएका छन् । प्रस्ताव फिर्ताका पछाडिका कारणबारे केही बताएका छैनन् । तर कांग्रेसको ‘माथि’को निर्देशनबमोजिम कांग्रेसको प्रदेश टिम पछि हटेको अनुमान गरिएको छ ।

नामाकरणका लागि एकीकृत समाजवादी र जसपाले किरात लिम्बुवान सगरमाथा राख्न संयुक्त प्रस्ताव दर्ता गराएका छन् । कूल ९३ सस्दय रहेको प्रदेशसभामा एकीकृत समाजवादीका ४ र जसपाका १ सांसद छन् । एमाले ४०, कांग्रेस २९, माओवादी केन्द्र १३, राप्रपाका ६ सदस्य छन् ।

नामाकरण आजै बस्ने प्रदेशसभा बैठकबाट टुंगाे लगाइँदैछ । प्रस्ताव पारितका लागि कुल सदस्य संख्याकाे दुईतिहाइ अर्थात ६३ सदस्यकाे समर्थन चाहिन्छ ।