खाना पकाउने एलपीजी ग्यासको मूल्य बढाउने निगमको संकेत

१७ फागुन, काठमाडौं । भारतबाट मूल्य बढेर आएपछि नेपाल आयल निगमले खाना पकाउने एलपीजी ग्यासको मूल्य नेपालमा पनि बढ्न सक्ने संकेत दिएको छ । इन्डियन आयल कर्पाेरेसन (आईओसी) ले बुधबार पेट्रोलियम पदार्थको मूल्य घटाए पनि ग्यासको मूल्य भने बढाएर पठाएको छ । यहि मूल्यमा बेच्दा निगमलाई अब प्रतिसिलिण्डर ६३५ रुपौयाँ घाटा हुनेछ ।

निगम कर्मचारीका अनुसार आईओसीले पेट्रोलको मूल्य प्रतिलिटर एक रुपैयाँ २१ पैसा, डिजेलको मूल्य प्रतिलिटर पाँच रुपैयाँ ५ पैसा, मट्टीतेलमा तीन रुपैयाँ ४० पैसा र हवाई इन्धनमा सात रुपैयाँ तीन पैसा घटाएर पठाएको छ । तर, खाना पकाउने एलपीजी ग्यासको मूल्य भने प्रतिसिलिन्डर ३३९ रुपैयाँ ६ पैसा बढाएर पठाएको छ । नयाँ मूल्य सूची अनुसार निगमलाई आगामी १५ दिनमा अरुमा नाफा हुनेछ भने ग्यासमा घाटा हुनेछ ।

कर्मचारीका अनुसार खाना पकाउने एलपीजी ग्यासमा नेपाल आयल निगमलाई अब प्रतिसिलिन्डर ६३५ रुपैयाँ घाटा हुनेछ । आईओसीले आज पठाएको नयाँ मूल्य सूचीअनुसार एलपीजी ग्यासको मूल्य प्रतिसिलिन्डर ३३९ रुपैयाँ बढेर आएको छ । यससँगै एलपीजी ग्यासको खरिद लागत प्रतिसिलिन्डर २४३५ रुपैयाँ पुगेको छ । यसबारे अब बस्ने सञ्चालक समितिले निर्णय गर्नेछ । ति कर्मचारीले भने,‘भारतबाट बढेर आएको ग्यासको मूल्य अनुसार अब धेरै घाटा हुने देखिएको छ ।’

यसअघि खाना पकाउने एलपीजी ग्यासको खरिद लागत प्रतिसिलिन्डर २ हजार ९६ रुपैयाँ थियो । यो मूल्यअनुसार निगमलाई प्रतिसिलिन्डर २९६ रुपैयाँ घाटा थियो । निगमले उपभोक्तालाई एलपीजी ग्यास प्रतिसिलिन्डर १८ सय रुपैयाँमा बिक्री गर्दै आइरहेको छ । मूल्य नबढाइ बेच्दा अब निगमलाई एक महिनामा ग्यासको बिक्रीबाट १ अर्ब ८६ करोड रुपैयाँ घाटा हुने ति कर्मचारीको भनाइ छ । १५ दिनको अवधिमा मात्रै निगमलाई ग्यासको बिक्रीबाट ९३ करोड घाटा हुने उनले जानकारी दिए ।