पञ्चा सिंह नेतृत्वको विद्यार्थी संगठन आधिकारिक हो : माओवादी केन्द्र

१८ फागुन, काठमाडौं । स्ववियू चुनाव नजिकिँदै गर्दा संगठनभित्र विवाद चुलिएपछि नेकपा (माओवादी केन्द्र)ले पञ्चा सिंह नेतृत्वको गरिरहेको अखिल नेपाल स्वतन्त्र विद्यार्थी युनियन (क्रान्तिकारी) आफ्नो आधिकारिक भ्रातृ संगठन भएको जानकारी त्रिभुन विश्वविद्यालयलाई दिएको छ ।

माओवादी केन्द्रका महासचिव देवप्रसाद गुरुङले त्रिभुवन विश्वविद्यालयमा पत्र पठाउँदै सिंह नेतृत्वको संगठन आधिकारिक भएको जानकारी दिएका हुन् ।

संगठनको नेतृत्वमा सिंह आएदेखि नै विवादमा परेको अनेरास्ववियु (क्रान्तिकारी)मा उपाध्यक्ष पवन कार्कीले पक्षले सिंहको नेतृत्व अस्वीकार गर्दै नेतृत्वमा दाबी गर्दै आइरहेका बेला संगठन विघटन गरी सिंहकै नेतृत्व्मा चुनावमा सहभागी गराउने पार्टीले बताउँदै आइरहेको छ ।

यही अवस्थाबीच कार्की पक्षले चुनावको पूर्ण कमाण्ड सिंहलाई दिन नसकिने भनेर छुट्टै भेला, बैठक गर्न नछाडेपछि मातृ पार्टीका महासचिव गुरुङले पत्र काटेर जानकारी दिएका हुन् । त्रिवि अन्तर्गत देशैभरका क्याम्पसहरुमा आगामी चैत ५ गते स्वतन्त्र विद्यार्थी युनियन (स्ववियु) चुनाव हुँदैछ ।