कर्णाली प्रदेश सरकारबाट फिर्ता भयाे राप्रपा, काेशीमा भने अनिर्णित

१८ फागुन, सुर्खेत । केन्द्र सरकारबाट फिर्ताको ६ दिनपछि राप्रपा कर्णाली प्रदेश सरकारबाट पनि फिर्ता भएको छ । माओवादी केन्द्र नेतृत्वको प्रदेश सरकारलाई समर्थन दिँदै आएको राप्रपाले बिहीबार आफ्नो समर्थन फिर्ता लिएको हो ।

बिहीबार राप्रपा कर्णाली प्रदेशसभा सदस्य सन्तोषी शाहीले मुख्यमन्त्री राजकुमार शर्मालाई दिएको समर्थन फिर्ता लिएको जानकारी प्रदेश प्रमुख तिलक परियारसँग भेट गरेर पत्रसहित दिएकी छन् ।

पत्रमा मुख्य राजनीतिक दलहरु देश विकास र सुशासनमा लाग्नुको साटो अस्थिर राजनीतिक खेलमा लागेको भन्दै दुःख व्यक्त गरिएको छ । राप्रपा अस्थिर राजनीतिक खेलबाट अलग भएर प्रतिपक्षको भूमिकामा रहने पार्टीको निर्णयअनुसार समर्थन फिर्ता लिने निर्णय लिएको जनाइएको छ ।

माओवादी केन्द्रका अध्यक्ष प्रचण्डको नेतृत्वमा केन्द्र सरकार गठन हुँदा केन्द्रदेखि प्रदेश सरकार गठनका हुँदा एमालेसहित बनेको ७ दलीय सत्ता गठबन्धनमा रहेर समर्थन गरेको राप्रपाले केन्द्रमा आएको सत्ता समिकरण परिवर्तनपछि गत शनिबार नै केन्द्रदेखि प्रदेशसम्म सरकारबाट फिर्ता हुने निर्णय लिएको छ । कोशी प्रदेश सरकारलाई दिँदै आएको समर्थनबारे भने राप्रपाले निर्णय लिइसकेको छैन । त्यहाँ राप्राका ६ सदस्य छन् ।