हामी यो गठबन्धनलाई पाँच वर्ष टिकाएर लान्छौः प्रधानमन्त्री प्रचण्ड

१८ फागुन, काठमाठौं । नेकपा माओवादी केन्द्रका अध्यक्षसमेत रहेका प्रधानमन्त्री पुष्पकमल दाहाल प्रचण्डले ८ दलीय गठबन्धन ५ वर्ष टिक्ने बताएका छन् । प्रतिनिधिसभा र राष्ट्रियसभाका सांसदहरूलाई अभिमुखीकरण दिन काठमाडौंको तीनकुनेमा आज आयोजित कार्यक्रमलाई सम्बोधन गर्दै प्रधानमन्त्री प्रचण्डले गठबन्धन दीर्घकालीन हुने दावी गरे ।

एमालेसँगको गठबन्धनको सुरुआतमै संसद् विघटन सही थियो कि गलत थियो भन्ने डिबेट आएपछि आफूलाई पहिल्यै गठबन्धन धेरै समय नटिक्ने लागेको उनले बताए । उनले अहिलेको गठबन्धन चोचोमोचो गरेर सरकार गठनका लागि मात्रै नभएर लोकतान्त्रिक नियम र मान्यताको रक्षाका लागि भएको बताए । प्रचण्डले नेपाली कांग्रेसभित्र माओवादी र माओवादीभित्र कांग्रेस रहेको दावी गर्दै अहिलेको गठबन्धन देखेर जनता खुसी भएको भन्दै कांग्रेसभित्र माओवादी र माओवादीभित्र कांग्रेस रहेको बताए ।

उनले आफ्ना लागि प्रधानमन्त्री पदभन्दा पनि राजनीतिक विचार प्रमुख भएको बताए । नेकपा एमालेका अध्यक्ष केपी शर्मा ओलीसँगको छलफलमा आफूले प्रधानमन्त्रीभन्दा आफ्नो राजनीतिक विचार, संविधान र लोकतन्त्र प्रमुख हो भनेर प्रस्ट रुपमा बताउने गरेको समेत उल्लेख गरे । ठूलो पार्टीको हैसियतामा कांग्रेसलाई राष्ट्रपति दिने प्रस्ताव लिएर जाऔंभन्दा ओलीले नमानेपछि एमालेसँगको गठबन्धनबाट बाहिरिनुपरेको प्रधानमन्त्री प्रचण्डले बताए ।

उनले राष्ट्रपतिका उम्मेदवार रामचन्द्र पौडेललाई ८ दलको मात्रै नभएर संसद्मा र निर्वाचन आयोगमा दर्ता भएका १० दलभन्दा बढीको समर्थन रहेको बताए । ’रामचन्द्रजीलाई नेपाल समाजवादी पार्टी, नेपाल आम पार्टीको पनि समर्थन छ । स्वतन्त्र सांसदहरूको पनि समर्थन रहेको जानकारी गराउँदछु,’ उनले भने । प्रतिनिधिसभामा प्राप्त गरेको विश्वासकको मतले आफूले नेपालमा राष्ट्रिय सहमति र एकताको रुपमा व्यक्त भएको बताए ।

प्रचण्डले भने,’मलाई विश्वास आएको विश्वासको मतले नै मैले आउने दिनेमा त्यस्ता पदमा राष्ट्रिय सहमति गर्न उचित हुन्छ भन्ने संकल्प गरेको थिएँ । राष्ट्रिय समझदारी र सहमति गर्नुपर्छ भन्ने स्टेटमेन्ट त्यहीबेला देखि दिँदै आएको हुँ । त्यसपछि पनि मैले बालुवाटारमा बैठक बोलाएर राष्ट्रिय सहमतिको कुरा गरेको थिएँ ।’ एमाले अध्यक्ष ओलीसँगको पछिल्लो वार्तामा मुलुकको वर्तमान अर्थतन्त्र, राजनीतिक स्थिति र भूराजनीतिक चुनौतीमा राष्ट्रिय सहमति आवश्यक परेको र दुवै जना गएर कांग्रेसलाई राष्ट्रपति पद दिऔं भनेर प्रस्ताव राखेको उनले बताए ।

उनले भने, ’राजनीतिमा देखापरेका विभिन्न समस्या सामना गर्न त्यसो किन नगर्ने भनेर मैले केपीजीलाई भनेको थिएँ । देशको ठूलो पार्टीलाई हामीले राष्ट्रपति तपाईंहरुलाई जिम्मा है भन्दा आम जनतामा राम्रो सन्देश हुने र त्यो सन्देशले शान्ति र संविधानमाथि खेल्ने विभिन्न खालको तत्वहरूलाई पनि म्यासेज जान्थ्यो । दुर्भाग्य भनौं उहाँ सहमत हुनुभएन । उहाँले कांग्रेसलाई समर्थन गर्न सक्दैनौं भनेपछि हामी दुई बाटो लाग्यौं । हेर्दै जानुहोला यो गठबन्धन ५ वर्ष टिक्छ । मन्त्रिपरिषद विस्तार प्रक्रिया आजैदेखि सुरू गर्छु ।’