गण्डकी प्रदेशको चालु अधिवेशन अन्त्य

१८ फागुन, काठमाडौं । गण्डकी प्रदेशसभाको चालु अधिवेशन अन्त्य भएको छ । प्रदेशका मुख्यमन्त्रीको सिफारिसमा प्रदेश प्रमुख पृथ्वीमान गुरुङले चालु अधिवेशन अन्त्य गरेका हुन् । प्रदेश अधिवेशन अन्त्य भएको प्रमुखकाे कार्यालयले बिहीबार एक सूचना जारी गरेर जानकारी दिएकाे हाे ।

‘प्रदेश सरकार गण्डकी प्रदेश, मन्त्रिपरिषद्को सिफारिसमा नेपालको संविधानको धारा १८३ को उपधारा (२) बमोजिम प्रदेश प्रमुख पृथ्वीमान गुरुङबाट प्रदेश सभाको चालु अधिवेशन ०७९ फागुन १८ गते बिहीबार राति १२ बजेटबाट अन्त्य भएको ब्यहोरा सम्बन्धित सबैको जानकारीको लागि अनुरोध छ’ सूचनामा भनिएको छ ।

बुधबार बसेकाे प्रदेशसभा बैठक प्रदेश प्रमुख गुरुङको सम्बोधनपछि सभामुख कृष्ण धितालले अर्को सूचना नभएसम्मका लागि भन्दै बैठक स्थगित गरेका थिए ।

केन्द्र सरकारमा एमाले सरकारबाट बाहिरिएपछि एमाले नेतृत्वको प्रदेश सरकार ढल्ने चर्चा भइरहेका बेला गण्डकीको अधिवेशन एकाएक अन्त्य भएको जानकारी दिइएको हो ।

गण्डकीका मुख्यमन्त्रीमा एमालेका खगराज अधिकारी छन् । काेशी, लुम्बिनीका मुख्यमन्त्री पनि एमालेकै छ । सुदूरपश्चिमका रहेका एमालेका मुख्यमन्त्री विश्वासकाे मत लिन नसक्दा पदमुक्त भइक्सकेका छन् ।