विश्वकप क्रिकेट लिग-२: नेपाल युएईसँग ३१.५ ओभरमै अलआउट हुँदै पराजित

१८ फागुन, काठमाडौं । विश्वकप क्रिकेट लिग–२ मा नेपाल युएईसँग ६८ रनले पराजित भएको छ । बिहीबार युएईको दुबई अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको घरेलु टोलीसँग पराजित भएको हो ।

यसअघि ब्याटिङबाट यूएईले निर्धारित ५० ओभरमा ८ विकेट गुमाउँदै २०७ रन जोडेर २०८ रनको चु्नौति दिएको थियो । जवाफी ब्याटिङमा नेपाल ३१.५औं ओभरमा अलआउट भएको थियो । नेपाली ब्याट्सम्यानले १३९ रन मात्र जोडे ।

नेपालका लागि कुशल मल्लले सर्वाधिक ६० रन बनाएका थिए । नवौं नम्बरमा ब्याटिङ गर्न आएका सन्दीप लामिछानेले २६ रन बनाए भने आशिफ शेखले १७ रन जोडेका थिए । अरू कुनैपनि नेपाली ब्याटरले दोहोरो अंकको रन जोड्न नसक्दा पराजित हुन पुगेको हो ।