विकास र रुपान्तरण विरोधी शक्तिहरुले सत्ता कब्जा गरेः ओली

२० फागुन, काठमाडौं । नेकपा एमालेका अध्यक्ष केपी शर्मा ओलीले राज्यको रुपान्तरणका विरोधीहरुले एमालेमाथि प्रहार गरेर फेरी राज्य सत्ता कब्जा गरेको बताएका छन् । उनले आठदलीय गठबन्धनप्रति लक्षित गर्दै राज्यको भलो नचाहने शक्तिबीचको साँठगाँठबाट राज्य सत्ता कब्जा गरिएको बताएका छन् । उनले अहिले अमूक शक्ति एमाले सिध्याउने खेलमा लागेको भन्दै बुद्धिजीवीहरुसँग सहयोग पनि मागेका छन् ।

शनिबार भक्तपुरमा आयोजित नेपाल बुद्धिजीवी परिषद्को तेस्रो बैठकलाई सम्बोधन गर्दै ओलीले क्षुद्र स्वार्थमा अल्झिएका तथा सामाजिक रूपान्तरण र परिवर्तनका विरोधी शक्तिहरूले सत्ता कब्जा गर्न सफल भएको बताए । उनले जनतालाई भ्रममा पार्ने, अल्मल्याउने र नेकपा एमाले माथि पहार गर्ने काम भइरहेको भन्दै बुद्धिजीवी समाजलाई यो भ्रमजालबाट मुक्त बनाउन सहयोगका लागि आग्रह पनि गरेका छन् ।

ओली एमाले मात्र देश बनाउने शक्ति भएको तर पटक पटक एमाले सत्तामा पुगेका बेला चाारैतिरबाट प्रहार हुने गरेको बताए । उनले नाम नलिएपनि अहिलेको आठदलीय गठबन्धन विकास र रुपान्तरणको विरोधी भएको आरोप लगाए । एमालेको सहकार्यमा सरकार अगाडी बढेको देख्दा जनतामा केहि होला कि भन्ने आसा पलाए पनि त्यसलाई निरुत्साही गर्ने ढंगबाट सत्ता कब्जा भएको बताए ।

ओलीले एमालेजस्तो पार्टी निर्वाचनमा हार्छ भनेर केही बुद्धिजीबीहरुले भनेको उल्लेख गदै निवार्चन परिणामले गतल साबित गरेको उनको भनाई राखे । उनले भने, ‘जनतालाई दिग्भ्रमित पार्न विरोधीहरु लागि परेका छन् । उनीहरुलाई भ्रमबाट मुक्त पार्ने काम बुद्धिजीवीको हो । जनतालाई तर्साउने, धम्याउने कामहरु भइरहेका छन्, सचेतना जगाउनुस् ।’ ओलीले रेलको डिब्बा र इन्जीनसँग तुलना गर्दै बुद्धिजीवी इन्जीन भएको बताए ।

उनले देशका लागि एमालेले राम्रो गर्न खोज्दा सबैतिरबाट प्रहार भएको भन्दै क्षुद्र स्वार्थमा अल्झिएकाहरूले नै सत्ता कब्जा गरेको दोहोर्याए । देशको अहितमा जनविरोधी र राष्ट्रघाती तत्वहरूको चर्को आवाज आउन थालेकाले त्यसबाट जनतालाई मुक्त गर्न सक्नुपर्ने बताए । उनले भने ‘दुर्भाग्यको कुरा देशका लागि एमालेजस्तो पार्टीले राम्रो गर्न खोज्दा सबैतिरबाट प्रहार हुन खोज्छ । यथार्थ त्यही हो । किनभने सामाजिक रूपान्तरण परिवर्तनका विरोधी शक्तिहरू आफ्ना क्षुद्र स्वार्थमा अल्झिएका शक्तिहरू सत्ता कब्जा गर्न सफल छन् अहिले पनि ।’

उनले उनीहरू नै जनता अलमल्याउन र चटके कुरा गर्न सफल भएको भन्दै बौद्धिक जगत्ले दिग्भ्रमित पार्ने शक्तिहरूबाट जनतालाई मुक्त गर्न बिगुल फुक्ने काम गर्नुपर्ने बताए । इतिहास निर्माणका प्रेरक शक्ति हिजो, आज र भोलि पनि जनता नै भएको भन्दै जनतालाई सही मार्गदर्शन गर्न सक्नु अहिलेको चुनौती रहेको ओलीको भनाइ छ । ओलीले विरोधी जमातले सङ्गठित र सक्रिय ढङ्गले सामाजिक सञ्जालबाट एकै पटक आक्रमण गर्न सक्ने भए पनि त्यसबाट नआत्तिन आग्रह गरे ।

उनले भने, ‘सय जना विरोधीले एकै पटक आक्रमण गरे भने नआत्तिनुस्, तपाईँको विचारबाट उनीहरु आत्तिएर एकै पटक आक्रमण गर्न संगठित ढंगले सक्रिय भएका हुन् । नकारात्मक टिप्पणीको बाढी आउनु भनेको तपाइका विचारसँग आत्तिएर उनीहरु खनिएका हुन् । उनीहरुले तपाइको विचारलाई इगनोर गर्न सक्थे तर तपाइको प्रस्तुति यति प्रभावकारी छ कि उनीहरुले इगनोर गर्न सक्दैनन् र संगठित ढंगले हमला गर्छन् ।’