प्रचण्डले विश्वासको मत लिएपछि मात्र देउवाले मन्त्री पठाउने

२० फागुन, काठमाडौं । नेपाली कांग्रेसका सभापति शेरबहादुर देउवा र प्रधानमन्त्री पुष्पकमल दाहाल ‘प्रचण्ड’बीच विश्वासको मत दिएपछि मात्र कांग्रेसबाट मन्त्री पठाउने सहमति भएको बताइएको छ । संसदबाट विश्वासको मत लिनु अघि प्रधानमन्त्री प्रचण्डले मन्त्रिपरिषद विस्तारबारे अन्यदलहरुसँग छलफल भने जारी राख्नेछन् । तर, कांग्रेसले भने प्रधानमन्त्रीले विश्वासको मत लिएपछि मात्र पार्टीमा छलफल चलाउने भएको हो ।

आठदलीय गठबन्धनमा प्रधामन्त्रीले सरकार विस्तारबारे छलफल सुरु गरेका छन् । अहिले प्रधानमन्त्रीसँग १६ मन्त्रालयमात्र छन् । कांग्रेसले ९ मन्त्रालयमा दावी गरेपनि उप्रधानसहित ८ मन्त्रालय लिने दुई नेताबीच सहमति भइसकेको नेकपा माओवादीका एक नेताले जानकारी दिएका छन् । उनका अनुसार प्रधानमन्त्रीले विश्वसको मत लिनुभन्दा अगाडी नै मन्त्रिमण्डललाई पूर्णता दिन चाहेका थिए । तर, सभापति देउवाले दुबै निर्वाचन सकिएर विश्वासको मत लिनुभन्दा अगाडी मन्त्रिपरिषद विस्तार गर्दा समस्या आउन सक्ने भनेपछि प्रधानमन्त्री पनि पछि हटेका हुन् ।

देउवाले तत्काल सरकारमा सहभागि हुँदा जनतामा नराम्रो सन्देश जाने र मन्त्रिपरिषद विस्तार हुँदा विवाद आउन सक्ने भएकाले पहिले विश्वासको मत लिन प्रधाानमन्त्रीलाई सुझाएका थिए । अहिले सबै दलले सरकारमा जाँदा उपप्रधानमन्त्रीसहित खोजेकाले कति जना उपप्रधानमन्त्री बनाउने र त्यसको मापदण्ड कस्तो बनाउने भन्नेबारे छलफल चलिरहेको ति नेताले बताए । कुन दललाई कति मन्त्रालय दिने भन्नेबारे पहिले प्रधानमन्त्री प्रचण्डले अन्यदलहरुसँग छलफल गर्ने र गठबन्धनको बैठक डाकेर मन्त्रायलयकाबारे छलफल गर्ने सहमति भएको उनको भनाइ छ ।

उता, कांग्रेसका उपसभापति पूर्णबहादुर खड्काले पनि राष्ट्रपति र उपराष्ट्रपतिको निर्वाचनपछि मात्रै प्रचण्ड नेतृत्वको सरकारमा कांग्रेस सहभागी हुने बताएका छन् । नयाँ सरकार गठनको विषयमा पनि त्यसपछि नै छलफल चल्ने उनले बताए । शनिवार सुर्खेतमा आयोजित एक कार्यक्रममा बोल्दै खड्काले राष्ट्रपति र उपराष्ट्रपतिको निर्वाचनपछि प्रधानमन्त्री प्रचण्डले विश्वासको मत लिने र त्यसपछि प्रचण्ड नेतृत्वकै सरकारका कांग्रेस सहभागी हुने बताएका छन् ।