झलनाथ र शंकरबीच पार्टी एकताबारे छलफल

२१ फागुन, काठमाडौं । प्रतिपक्षी दल नेकपा (एमाले)का महासचिव शंकर पोखरेल र सत्तारुढ दल नेकपा (एकीकृत समाजवादी)का नेता झलनाथ खनालबीच पार्टी एकताबारे छलफल भएको छ ।

नेता खनालको निजी निवास डल्लुमा शनिबार साँझ भएको छलफलमा महासचिव शंकर पोखरेलले पार्टी एकताको प्रस्ताव गरेको बताइएको छ । मुलुकको राजनीतिक परिदृष्य र आर्थिक संकटले सीमा नाघ्ने विन्दूमा पुगेको भन्दै दुई नेताबीच पार्टी एकताका लागि अनौपचाकि खाकासहित छलफल भएको बताइएको छ । उनीहरुले राजनीतिक रुपमा वामपन्थीबीच एकता वा तत्काल एकता संभव नभए सहकार्य गरेर अगाडि बढ्नेमा सहमत भएको बताइएको छ ।

अहिले देशको राजनीतिक आर्थिक अवस्था खराब रहेको र यस्तो बेला राजनीतिक नेताहरुबीच भेटवार्ता हुनु स्वभाविक भएको खनालले बताएका छन् । पाेखरेल एमाले अध्यक्ष केपी शर्माे ओलीकाे दूतकाे रूपमा त्यहाँ पुगेका थिए ।

केन्द्रदेखि प्रदेशसम्म रजनीतिक समीकरण फेरिएसँगै एमाले र एकीकृत समाजवादीका नेताहरुबीचको निरन्तर भेटवार्ता भइरहेको छ । गत मंसिरको प्रतिनिधिसभा चुनावमा खनाल इलामबाट हारेपछि पार्टीभित्र कर्नर पारिएका छन् । सोही कारण उनलाई अध्यक्ष नेपालले पार्टीबीच हुने वार्ता वा छलफलमा सहभागी गराउन छाडेका छन् भने बहुपक्षीय छलफलमा समेत उनलाई सहभागी गराउन अरुरी ठानेका छैनन् । यसबाट खनाल अध्यक्ष नेपालसँग पछिल्लो समयमा रुष्ट बन्दै गएका छन् ।

उनले राष्ट्रपतिमा एकीकृत समाजवादीसहितका उम्मेदवार रामचन्द्र पौडेललाई मत दिने नदिनेबारे पार्टीभित्र एक मत नरहेको भन्दै सार्वजनिक रुपमै अभिव्यक्ति दिइरहेका छन् ।

उनले पार्टी अध्यक्ष नेपालप्रति लक्षित गर्दै  पार्टी सामूहिक निर्णयबाट चल्ने भन्दै व्यक्तिको निर्देशन र योजनामा नचल्ने बताउँदै आएका छन् । इमालबाट एमालेका महेश बर्ताैलासँग पराजित भएका उनले त्यस क्षेत्रमा पुन: मतदानकाे माग गर्दै सर्वाेच्चमा दायर रिट विचराधीन छ ।

यद्यपि महासचिव पोखरेल दाङबाट माओवादी केन्द्रकी रेखा शर्मासित पराजित भएका थिए । दुवै जना संसदमा छैनन् । शर्मा अहिले सरकार प्रवक्ता तथा संचारमन्त्री छिन् ।