लघुवित्त र मिटरब्याजीविरुद्धको संघर्षमा विप्लवकाे साथ

२१ फागुन, काठमाडौं । विप्लव नेतृत्वको नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ लघुवित्त तथा बैंकको चर्को ब्याज र मिटरब्याजीको नाफाखोर ज्यादतिबाट पीडित भएका नागरिकको पक्षमा उभिएका छन् ।

उनले आइतबार पिज्ञप्ति जारी गरेर पीडितहरुले पीडकहरुमाथि कारबाही र न्यायका लागि भन्दै देशभर जारी राखेका संघर्षमा उनले साथ दिने घोषणा गरेका छन् । यसअघि जिल्ला र क्षेत्रमा मात्र सीमित रहेर संघर्षलाई साथ दिँदै आएका उनी नेतृत्वको पार्टीले अब देशैभरका संघर्षमा साथ दिने स्पष्ट पारेकाे हो ।

महासचिव विप्लवले एक विज्ञप्ति निकालेर देशमा लघुवित्त, मिटरब्याज र चर्को बैंक ब्याजले लाखौ जनताको जीवन प्रताडित रहेको र उनीहरुकै आतंक र दमन झेल्न नसकेर सयौं संख्यामा नागरिकहरुले आत्महत्या र आत्मदाहको बाटोबाट ज्यान गुमाइरहेका बताउँदै अन्यायबाट मुक्त हुन लिइएको संघर्षको बाटो सही र एकमात्र विकल्प भएको बताएका छन् । पीडितहरुले संघर्षमा उत्रनु जायज भएको बताएका छन् ।

साथै उनले संसदीय व्यवस्थाका सरकारले पीडितहरुको उठाएको न्यायको आवाज नसुेनर उल्टै सरकारले प्रहरी प्रशासन लगाएर आन्दोलनकारी पीडितहरुमाथि दमन र लाठी प्रहार घटनालाई समाधान देख्ने हदैसम्मको जनविरोधी बाटो लिएको भन्दै दमनको घोर विरोध गरेका छन् । न्यायिक आवाज सुन्न र दमन रोक्न पनि उनले सरकारसँग आग्रह गरेका छन् ।

‘संसदीय व्यवस्थाले जनताको आवाज सुन्नु र उनीहरुको रक्षामा न्यायीक कदम चाल्नुको सट्टा प्रशासन र प्रहरीलाई लघुवित्त एवं चक्रब्याजीको रक्षामा जनतालाई दमन गर्न परिचालन हुन निर्देशन गर्नु हदै जनविरोधी एवं असैह्य कार्य होे । हाम्रो पार्टी सरकारको यो कदमको घोर विरोध गर्दछ’ विज्ञप्तिमा उल्लेख छ ।

साथै मिटरब्याजी र वित्तीइ संस्थाहरुको चर्को ब्याज धन्दाविरुद्ध पीडितहरुले चलाइरहेको संघर्षले दलाल पूँजीपतिवर्ग र विभिन्न नामका शोषक, चुसाहा संस्थाहरुविरुद्धको संघर्षमा बल पुग्ने उल्लेख गर्दै नेपाल संघर्षको पक्षमा सदैव रहने समेत स्पष्ट पारिएको छ । संघर्ष जारी राख्न समेत अपिल गरिएको छ ।

यस्तै जाजरकोटमा पार्टीका केन्द्रीय सदस्य, जिल्ला सचिवलगायत नेता कार्याकर्ताहरुलाई गिरफ्तार गरेर प्रशासनले अनाहकमा झुटा मुद्दा लगाउन खोजेको भन्दै आपत्ति जनाएका छन् । देशैभर जारी राखिएका दमन र गिरफ्तार रोक्न माग गर्दै गिरफ्तार गरिएका पाँचै जनालाई निसर्त रुपमा नेता कार्यकर्ताहरुलाई रिहा गर्न माग गरिएको छ ।

दमन जारी राखे त्यसविरुद्ध चल्ने संघर्षको जिम्मा लघुवित्त र राज्यले लिनुपर्ने चेतावनी दिइएको छ ।

यसअघि नेकपाले कपिलवस्तुको शिवराजगढी नगरपालिका लगायत विभिन्न क्षेत्रमा लघुवित्तलाई प्रवेश निषेध गरेको घोषणा गरिरहेको छ ।

यस्तै, मेडिकल व्यवसायी झापाका दुर्गा प्रसाईंले पनि लघुवित्त कम्पनीको किस्ता नतिर्न र बैंकको चर्को ब्याज नबुझाउन भन्दै सार्वनिक रुपमै अपिल गरिरहेका छन् । त्यसपछि गृहमन्त्रालले प्रसाईंको गतिविधिमाथि निगरानी राख्न ७७ वटै जिल्ला प्रशासालाई निर्देशन समेत दिइसकेको छ ।

उनले आइतबार नै भएकाे एक कार्यक्रममा जनयुद्धका भएका राम्रा नराम्रा घटनाका सम्पूर्ण जिम्मेवारी आफूले लिने समेत स्पष्ट पारेका छन् ।