ठेक्काकाे म्याद सकिँदा सडककाे काम एकचाैथाइ पनि नसकेपछि स्थानीयले गरे चक्काजाम

२१ फागुन, काठमाडौं । सडक निर्माणमा चरम लापरवाही र ढिलाई गरेपछि चाँडो बनाउन माग गर्दै दाङमा स्थानीयले आधा घण्टा चक्काजाम गरेका छन् । तुलसीपुर–घोराही चार लेन सडकखण्ड छिटो निर्माण हुनुपर्ने माग गर्दै आइबार बिहान ११ बजेदेखि आधा घण्टासम्म तुलसीपुरको हात्तीखौवा क्षेत्रमा चक्काजाम गरेका हुन् ।

तुलसीपुर–घोराही सडकखण्ड समयमै निर्माण कार्य पूरा नहुँदा सर्वसाधारणले सास्ती व्यहोर्नु परेको भन्दै तत्काल काम सक्न माग गरे । सडक ४ लेनको नबनेको उनीहरुको भनाइ छ । तुलसीपुरको हात्तीखौवा चोकदेखि घोराहीको कुइरेपानीसम्म २८.१९ किलोमिटर सडक बनाउने जिम्मा भारतको मुम्बईस्थित तथ्य इञ्जिनियरिङ एन्ड इन्फ्रा प्रोजेक्ट प्रालिले लिएको छ ।

सन् २०१९ जनवरी २८ मा सम्झौता हुँदा ३३ महिनाभित्र सडक निर्माणको काम पूरा गर्नुपर्ने उल्लेख भएपनि आजसम्म काम एक चौथाई पनि नसकेपछि स्थानीय आधmोशित बनेका छन् ।

सडकको दायाँ बाँया खनेर भत्काएर अलपत्र छोडिदिँदा हिँडडुलमा समेत जोखिम बढेको छ । निर्णय सुरु गरेयतामात्र यो क्षेत्रमा सवारी दुर्घटनामा २५ जनाको ज्यान गएको उनीहरुको भनाइ छ । सुख्खा मौसममा धुलाम्मे र बर्षामा सडक खण्ड हिलाम्मे हुननाले यहाँका बासिन्दालाई चर्को मार परेको छ । ठेकेदारले अहिले त कामै ठप्प राखेका छन् ।