बसले किच्दा निजगढमा एक जनाको मृत्यु

२१ फागुन, काठमाडौं । बारामा बसले किच्दा एक जनाको मृत्यु भएको छ । आइतबार मध्यान्ह वीरगंजबाट विराटनगरतर्फ जाँदै गरेको १ ख ५७०० नम्बरको बस पछाडि सार्ने क्रममा किचेर निजगढ नगरपालिका ८ बुद्धचोकका ५० वर्षीय मजिद मियाको ज्यान गएको हो ।

घाइते मियालाई तत्काल स्थानीय सिटी अस्पतालमा उपचारपश्चात थप उपचारको लागि गण्डक हेल्थकेयर अस्पताल वीरगञ्ज रेफर गरिएकोमा अस्पताल पुर्‍याएलगत्तै उनलाई चिकित्सकले मृत घोषणा गरेको बारा प्रहरीले जनाएको छ ।

बस चालक सिरहा सुखिपुर नगरपालिका ८ का ४२ वर्षीय ललनकुमार दासलाई प्रहरीले नियन्त्रणमा लिई इलाका प्रहरी कार्यालय निजगढको हिरासतमा राखेको छ ।घटनाबारे थप अनुसन्धान भइरहेको प्रहरीले जनाएको छ ।