राष्ट्रिय राजनीतिबारे सभापति देउवा र नेम्वाङबीच छलफल

२२ फागुन, काठमाडौं । नेपाली कांग्रेसका सभापति शेरबहादुर देउवा र नेकपा एमालेका तर्फबाट राष्ट्रपतिका उम्मेदवार रहेका सुवास नेम्वाङबीच परिछल्लो राजनीतिक घटनाक्रमका विषयमा छलफल भएको छ । २५ फागुनमा हुने राष्ट्रपति निर्वाचनको सम्मुखमा एमालेका संसदीय दलका उपनेतासमेत रहेका नेम्वाङले कांग्रेस सभापति देउवासँग भोट माग्ने सिलसिलमा भेट गरेका भएपनि उनीहरुबीच राष्ट्रिय राजनीतिले कांग्रेस र एमालेबीच सहकार्य खोजेको विषयमा छलफल भएको थियो ।

दुबै दलका उम्मेदवार राष्ट्रपतिको प्रतिस्पर्धामा छन् । यद्यपी नेम्वाङले आफु राष्ट्रपतिको उम्मेदवार भएकाले भेटगर्न आएको बताएका थिए । कांग्रेसबाट रामचन्द्र पौडेल राष्ट्रपतिका उम्मेदवार छन् । दुई नेताहरुबीच राष्ट्रपति निर्वाचनका अलावा अन्य राष्ट्रिय राजनीतिक विषयमा लामो छलफल भएको स्रोतको भनाइ छ । नेम्वाङले राष्ट्रका महत्वपूर्ण विषयहरुमा ठूला दल कांग्रेस र एमाले एकै ठाउँमा रहेर समान धारणा बनाउन आवश्यक देखिएको बताएका थिए ।

राजनीतिक स्थिरता र दिगो विकासका लागि समेत ठूला दल मिल्नुको विकल्प नरहेको नेम्वाङको भनाइ थियो । जवाफमा देउवाले कांग्रेसले आवश्यकताका आधारमा सबै दलसँग सहकार्य गर्दै आएको र भविश्यमा पनि सबै दलसँग राष्ट्रिय हितका विषयमा सहकार्य गरेर जाने बताएका थिए । देउवाले अहिलेको राजनीतिक अस्थिरता हटाउन सबै दलको सहयोग आवश्यक पर्ने भन्दै आर्थिक विकास लगायतका विषयमा काग्रेसले पनि सबै दल एक हुनुपर्ने आवश्यकता महसुस गरेको बताएका थिए ।