अवकाशको १६ महिनामा दाङमा जमेको एसपी–डीएसपीको जोडी

२३ फागुन, दाङ । दाङमा जिल्लामा अधिकांश क्रसर उद्योगहरु कानुन विपरित सञ्चालनमा रहेका छन् । त्यसमा स्थानीय जनप्रतिनिधिको लगानी छ, या उनीहरूको संरक्षण छ । ४५ उद्योग मध्ये १० ले मात्र अनुमति लिएका छन् । घरेलु तथा साना उद्योग कार्यालय दाङका अनुसार जिल्लामा हाल बालुवा र क्रसर उद्योग गरी ४५ उद्योगले नदीजन्य पदार्थ उत्खननका लागि अनुमति लिएका भएपनि  जसमध्ये १० उद्योगले मात्र क्रसरको काम गर्न अनुमति पाएका छन् । बाँकी ३५ ले पनि नदीजन्य पदार्थको उत्खनन गरिरहेका छन् । तर दाङमा प्रहरी प्रशासनकै मिलेमतोमा अवैध क्रसरको संरक्षण भइरहेको छ ।

तत्कालीन माओवादी र कांग्रेसको सरकारको पालामा शक्तिकेन्द्रको प्रयोग गरी दाङका प्रहरी प्रमुख एसपी वीरबहादुर वली र डीएसपी राजन गौतमले यसको संरक्षण गरिरहेको दाङकै प्रहरी अधिकृतहरु बताउँछन् । उनीहरु ३० वर्षे सेवा अवधिको कारण १६ महिनामै अवकाश हुने भएकाले पनि शान्तिसुरक्षामा भन्दा अवैध रुपमा सञ्चालित क्रसर उद्योगलाई संरक्षण गर्नमै तल्लिन रहेको दाङका प्रहरी अधिकारीहरुले बताएका छन् ।

‘अवकाशको समय छोटो भएकाले यहाँ आर्थिक चलखेल गरेर नै धेरैजसो मुद्धा मिलाउने काम भइरहेको छ’, स्रोतले भन्यो । उनीहरुले पैसा आउने भएपछि मुद्धा दर्ता नगर्ने र पैसा नआउने भएपछि मुद्धा दर्ता गर्ने क्रम बढेको पनि जुनिएर प्रहरी अधिकृतहरुको दावी छ । केही समय पहिले घोराही २ रामपुरमा एक युवतीलाई विवाहको आश्वासन दिएर बलात्कार गरेको आरोपमा पक्राउ परेका शिव न्यौपानेलाई म्याद नथपेर ४ दिनसम्म हिरासतमा राखेपछि मिलापत्र गराइएको घट्ना पनि सार्वजनिक भएको छ ।

मुद्धा मिलाउनका लागि केटी पक्षलाई पनि हिरासतमा राखेर अन्तिममा आर्थिक चलखेल गरेर न्यौपानेलाई डीएसपी गौतमकै निर्देशनमा छाडिएको स्रोतको दावी छ । मुद्धा मिलाउनका लागि आफुले द्वन्द्वकालमा एसपी वलीलाई बचाएको जस लिदै सई देवबहादुर वलीकै निर्देशनमा मुद्धा दर्ता हुने नहुने गरेको र सबै मुद्धाहरु सेटिङ उनैले गर्दै आएको ती अधिकृतहरुको दावी छ । ‘सई देवबहादुर हरेक मुद्धामा आफै डिल गर्छन् । देवबहादुर, डीएसपी गौतमले मुद्धामा डिलिङ गर्दै एसपीमार्फत मुद्धा मिलाउने गर्छन्’, स्रोतले भन्यो ।

स्कुटर चोरी प्रकरणमा लुम्बिनी प्रदेशका डीआईजी टेकप्रसाद राईले रेकर्डमा जनिने गरी कारवाही गर्न खोजेपछि डीएसपी गौतम माथिल्लो तहमा मिलाउने भन्दै विभिन्न राजनीतिक दलका नेताहरुको घरमा पुग्न थालेका छन् । डीएसपी गौतमको कमजोरी देखिएपछि प्रहरी महानिरीक्षक धीरजप्रताप सिंहले नै चासो लिएर छानविन गर्न लगाएका थिए । स्कुटर चोरलाई भगाउन डीएसपी गौतमकै हात रहेको पुष्टि भैसकेको छ ।