राष्ट्रपतिको निर्वाचनमा मतदानबारे निर्णय गर्न राप्रपाले बोलायो बैठक

२३ फागुन, काठमाडौं । राष्ट्रिय प्रजातन्त्र पार्टी (राप्रपा) ले राष्ट्रपति निर्वाचनमा भाग लिने वा नलिने र लिए कसलाई मतदान गर्ने भन्ने बारे निर्णय गर्नका लागि बैठक बोलाएको छ । राप्रपाका प्रवक्ता मोहन श्रेष्ठले बुधबार दिउँसो १ बजे बस्ने गरी केन्द्रिय कार्यसम्पादन समितिको बैठक बोलाइएको जानकारी दिएका छन् ।

उक्त बैठकमा राष्ट्रपति निर्वाचनका सन्दर्भमा बिभिन्न विकल्पमा छलफल हुनेछ । उनले राष्ट्रपतिको निर्वाचनमा भाग लिनुपर्ने र नपर्ने भन्ने दुई मत पार्टीमा रहेकाले पहिले पार्टीमा जे विषयमा सहमति हुन्छ त्यसपछि मात्र राष्ट्रपतिमा कसलाई सघाउने भन्ने विषयमा छलफल हुने बताए । २५ गते हुने निर्वाचनमा राष्ट्रपतिमा नेपाली कांग्रेसका रामचन्द्र पौडेल र एमालेका सुवास नेम्वाङ उम्मेदवार छन् ।