कूटनीतिक सम्बन्ध विस्तारका लागि खेल महत्वपूर्ण आधारः प्रधानमन्त्री

२३ फागुन काठमाडौं । प्रधानमन्त्री पुष्पकमल दाहाल ‘प्रचण्ड’ले समय परिवर्तनसँग खेलकुद क्षेत्र अहिले अन्तर्राष्ट्रिय कूटनीतिक सम्बन्ध विस्तारका लागि महत्वपूर्ण आधार भएको बताएका छन् । उनले अहिलेको युगमा खेलकुद राष्ट्रको गौरव, कूटनीतिको आधारस्तम्भ, अन्तर्राष्ट्रिय सम्बन्धको बलियो खम्बा, राष्ट्रिय अर्थतन्त्रको आधार र श्रम एवं मेहनतको संस्कृति विकासका लागि महत्वपूर्ण क्षेत्र भएको बताएका छन् ।

मंगलबार बिहान काठमाडौंको गोकर्णमा एसियन एथलेटिक्स एसोसिएसनको र नेपाल एथलेटिक्स संघको आयोजनामा आयोजित १६ औं एसियन क्रस कन्ट्री च्याम्पियनसिपको उद्घाटन गर्दै प्रधानमन्त्री प्रचण्डले खेल क्षेत्र विविधतामा एकता, सुशासन, दिगो विकास र समृद्धिको महत्वपूर्ण आधारका रूपमा विकसित भइरहेको बताए ।

उनले आजको आधुनिक युगमा खेलकुद राष्ट्रको गौरव, कुटनीतिको महत्वपूर्ण आधारस्तम्भ, अन्तर्राष्ट्रिय सम्बन्धको बलियो खम्बा भएको भन्दै यसले राष्ट्रिय अर्थतन्त्रको आधार तयार गर्न समेत मद्धत पुर्याउने बताए । जसले यसको महत्वलाई ठीक ढंगले बुझ्न सक्छ, त्यसले मात्रको राष्ट्रको सही नेतृत्व गर्न र जनआकांक्षालाई सम्बोधन गर्न सक्ने दावी गरे ।

प्रधानमन्त्री प्रचण्डले खेल कूटनीतिमार्फत् ठूलाठूला युद्ध र मानवसिर्जित विपत्तिहरू समाधान भएको, ठूलठूला द्वन्द्व र सम्भावित नरसंहारहरू टरेका र आपसी सहकार्य, विश्वास, विश्व एकता र पुनर्मिलनका आधार खडा भएकोसमेत बताए । खेल क्षेत्रको विकास वर्तमान सरकारको प्राथमिकतामा रहेको उनको भनाइ छ । प्रचण्डले आजको आधुनिक युगमा खेलकुद राष्ट्रको गौरव थप महत्वपूर्ण बन्दै गएको उल्लेख गरे ।

उनले खेल क्षेत्रको विकास सरकारको प्राथमिकतामा रहेको समेत स्पष्ट पार्दै कुनै समय खेलकुदलाई शारीरिक र मानसिक स्फूर्तिको माध्यमका रूपमा मात्र लिइने गरेको भए पनि अहिले समय फेरिएको भन्दै प्रधानमन्त्रीले आजको युगमा खेलकुद राष्ट्रको गौरव बढाउने माध्यमका रूपमासमेत विकास भएको बताए । खेल क्षेत्रको विकास राष्ट्र विकासको महत्वपूर्ण आधारका रूपमा चित्रण गर्दै प्रधानमन्त्रीले सरकार यस क्षेत्रसँग सम्बन्धित सम्पूर्ण नीतिहरूको प्रभावकारी कार्यान्वयन गर्न तथा अपर्याप्त नीतिहरू निर्माण गर्न र संस्थागत एवं संरचनागत विकासका साथै क्षमता अभिवृद्धि गर्न प्रतिबद्ध रहेको उल्लेख गरे ।

उनले खेल क्षेत्रमा लगानी वृद्धि गर्ने, खेलाडीको आत्मस्वाभिमान, प्रोत्साहन, पुरस्कारका साथै वृत्तिविकासमा थप योगदान गर्ने, राज्यको भूमिकालाई थप प्रभावकारी र जिम्मेवार बनाउन सरकार प्रयत्नशील रहने भन्दै एथलेटिक्सको विकासका निम्तिसमेत राज्यले उचित ध्यान दिने बताए । प्रचण्डले दुई दशकभन्दा लामो समयपछि नेपाललाई एसियन क्रस कन्ट्री च्याम्पियनसीपको आयोजनाको अवसर दिने एसियन एथलेटिक्स एसोसिएसन परिवारलाई सरकारको तर्फबाट धन्यवाद दिए । उनले आगामी दिनमा समेत नेपाल सो संस्थाको उच्च प्राथमिकतामा पर्ने विश्वाससमेत व्यक्त गरे ।