दुबईदेखि काठमाडौं रुटको उडानमा भर्ने महिला क्रु मेम्बरलाई सम्मान

२४ फागुन, काठमाडौं । अन्तर्राष्ट्रिय महिला दिवसको अवसर पारी राष्ट्रिय ध्वजाबाहक नेपाल एयरलाइन्सले काठमाडौं-दुबई र दुबई- कोठमाडौंको रुटमा सबै महिला सदस्य राखेर उडान गराएपछि यसले विश्वभर चर्चा पाएको छ । नेपाल एयरलाइन्सका अनुसार यो नेपालका लागि नयाँ इतिहास हो ।

सबै महिला सदस्य राखेर दुबई पठाएको जहाज दुबईमा अवतरण भई त्यहाँबाट यात्रु लिएर काठमाडौंमा अवतरण गरेपछि उनीहरुलाई स्वागत गर्न संस्कृति, पर्याटन तथा नागरिक उड्डयनमन्त्री सुदन किरातीसहित व्यक्तिहरु त्रिभुवन विमानस्थल पुगेका थिए ।

एयरलाइन्सको आजको दुबई–काठमाडौं रुटमा उडेको ए ३२० जहाजको सबै क्रु मेम्बर महिला थिए । जसमा पाइलट भावना पन्त र को–पाइलट सृजना रावतले जहाज उडाएका थिए । एयरहोस्टेस समेत सबै महिला राखेसँगै यो उडानको सम्पूर्ण जिम्मेवारी महिलाले सम्हालेका थिए ।

यो टोलीलाई त्रिभुवन अन्तर्राष्ट्रिय विमानस्थलमा मन्त्री किरातीले स्वागत गरेका थिए । दुई दिन अगाडि चालक दलको यसै जोडीले यो जहाज दुबई लगेको थियो । जुन आफैंमा इतिहास थियो । आज ११३औं अन्तर्राष्ट्रिय महिला दिवसको अवसर पारेर नेपाल एयरलाइन्सले यो संयोग जुराएको मन्त्री किरातीले नेपाल बहसलाई बताए ।