नेपाली विद्यार्थी विदेशमा पढ्न होइन, बस्न पाइन्छ भनेर गइरहेका छन् : गगन थापा

२४ फागुन, काठमाडौं । संघीय सांसद एवं नेपाली कांग्रेसका महामन्त्री गगनकुमार थापाले नेपाली विद्यार्थी अष्ट्रेलिया, युरोप, अमेरिका, बेलायतमा पढ्नका लागि नभई बस्न पाइन्छ भने विद्यार्थी भिसामा गइरहेको बताएका छन् । उनले नेपालको शिक्षा नागरिकको सहज पहुँचमा पुर्याउन निःशुल्कको तहसम्म उठाउन आवश्यक रहेको बताए ।

उनले अहिलेकै अवस्थाका सरकारको शिक्षाले पाँच वर्षपछि विज्ञान, गणित र अंग्रेजीमा शून्यतातिर जाने संभावना बढेको बताए । देशभित्र रोजगार ग्यारेन्टी नहुँदा पनि विद्यार्थीहरु प्लस टू सक्नेबित्तिकै सुविधासम्पन्न मुलुकहरुमा जाने लहर बढेको उनको भनाइ छ ।

काठमाडौंमा भएको नेपालको पछिल्लो आर्थिक अवस्थाबारे निजी क्षेत्रसँगको छलफल कार्यक्रममा बोल्दै महामन्त्री थापाले नेपाली विद्यार्थी अष्ट्रेलियामा पढ्न पाइन्छ भनेर नभई काम गर्न र बस्न पाइन्छ भनेर जाने गरिएको बताए । उनले नेपाली विद्यार्थीहरुलाई धेरैभन्दा धेरै संख्यामा आईटी पढाउनुपर्ने बताए । सरकारकै अध्यनले अबको पाँच वर्षपछि विश्वविद्यालयमा भर्ना हुन आउने विद्यार्थीहरुमा गणित, अंग्रेजी र विज्ञानमा निकै कमजोर अवस्थामा पाउने अवस्था रहेको बताउँदै विषयगत पढाईमा निकै सुधार गर्नुपर्ने बताए ।

‘जति पनि नेपाली विद्यार्थीहरु स्टुडेन्ट भिसामा विदेशमा पढ्न गएका छन्, ति सबै पढ्न गएका होइनन्’ थापाले भने, ‘ति त पढ्न भनेर त्यहाँ गएर काम गर्ने अनि त्यही बस्न पाइन्छ भनेर गएका हुन् । साँचाे कुरा के हाे भने उनीहरु नेपाल फर्केर आउन गइरहेका छैनन् ।’ नेपाली विद्यार्थी नेपालमा नेपालमा उत्कृष्ट शिक्षा र विश्वविद्यालय नपाएर विदेशमा नगइरहेको, त्यतै स्मार्ट जीवन बिताउन पाइन्छ भनेर गइरहेको बताए ।

‘यो कुरा थाहा पाउँदा पाउँदै हामी चुप बसिरहेका छौं’ उनले भने, ‘अष्ट्रेलियामा त विद्यार्थीहरु त्यहाँको लाइफ स्टाइल हेरेर गएको हो नि ।’ यहाँका विश्वविद्यालयहरुले केही मात्रामा सुधार गरेर, राम्रो देखाएरमा विद्यार्थी पलायन रोक्न नसकिने उनको भनाइ छ । शिक्षामा संरचनागत रुपमै आमूल परिवर्तन र देशभित्र रोजगारको ग्यारेन्टी सरकारले गर्नुपर्ने उनले बताए । विद्यार्थीको विदेश पलायनसँगै लैजाने अर्बौ रुपैयाँका कारण अर्थतन्त्र ओरालोतर्फ गइरहेको बताए ।