भोली हुने राष्ट्रपति निर्वाचनको सबै तयारी सकियोः आयोग

२४ फागुन, काठमाडौं । भोली बिहीबार हुने राष्ट्रपति निर्वाचनको सबै तयारी पुरा भएको निर्वाचन आयोगले जानकारी दिएको छ । निर्वाचन अधिकृत महेश शर्मा पौडेलले राष्ट्रपतिको निर्वाचनका लागि सम्पूर्ण तयारी पूरा भएको जानकारी दिएका हुन् । उनले बानेश्वरस्थित संसद् भवनमा स्थापना भएको राष्ट्रपति तथा उपराष्ट्रपतिको निर्वाचन कार्यालयले बिहीबार बिहान १० बजेदेखि ३ बजेसम्म मतदान गर्ने गरी सम्पूर्ण तयारी पूरा गरेको बताए ।

निर्वाचन अधिकृत पौडेलका अनुसार बिहीबार बिहान १० बजेदेखि ३ बजेसम्म मतदानको कार्यक्रम राखिएको छ । राष्ट्रपतिमा कांग्रेसबाट रामचन्द्र पौडेल र एमालेबाट सुवासचन्द्र नेम्वाङ उम्मेदवार छन् । राष्ट्रपति निर्वाचनका लागि संघीय संसद्का सदस्यहरू र प्रदेशसभाका सदस्यहरू मतदाता हुन्छन् । दलहरूले क्रम भोट हुनसक्ने आशंका गरिरहेका बेला निर्वाचन आयोगले बुथमा मतदाताले मोबाइल फोन लगायत कानुनले निषेध गरेका उपकरणहरू बोकेर जान नपाउने उनले बताए ।

उनले भने, ‘सुरक्षाकर्मीले आवश्यक सुरक्षा जाँच गर्छन्, यो गोप्य मतदान हो, बुथमा जाँदा मोबाइल लगायत कानुनले निषेध गरेका कुनै पनि उपकरण लैजान मिल्दैन ।’ कार्यालयले संघीय सांसदहरूका लागि एक र प्रदेशसभा सदस्यहरूका लागि अर्को गरी दुई वटा मतदान केन्द्र बनाएको छ । ‘दुई वटा मतदान केन्द्र बनाइएको छ । ती मतदान केन्द्रमा आवश्यक कर्मचारीहरू खटिएर सबै तयारी पूरा भइसकेको छ,’ निर्वाचन अधिकृत पौडेलले भने ।

भोलीको मतदानका लागि सबै प्रदेशबाट सांसदहरु आइसकेको दलहरुले जनाएका छन् । अहिलेसम्म राप्रपाको बैठक बसिरहेकाले उसले कुन पक्षलाई मतदान गर्छ वा गर्दैन भन्ने कुलेको छैन । यस्तै राष्ट्रिय स्वतन्त्र पार्टीले पनि बिहीबार मात्र निर्णय गर्ने बताएको छ । उसको प्रतिनिधिसभामा १९ सांसद छन् । डा. बाबुरा भट्टराइको दलसहित ९ दलले नेपाली कांग्रेसका उम्मेदवार रामचन्द्र पौडेललाई मतदान गर्ने बताएका छन् ।