संसद विघटनको पक्षमा उभिए राष्ट्रियसभाका अध्यक्ष तिमिल्सिना

२४ फागुन, काठमाडौं । संबैधानिक पद धारण गरिरहेका राष्ट्रियसभा अध्यक्ष गणेशप्रसाद तिमिल्सिनाले सरकार समस्यामा परेका बेला संसद विघटन गर्न नपाइने भन्ने नेपाली राजनीतिज्ञहरुको बुझाई गलत भएको बताएका छन् । उनले सरकार समस्यमा परेका बेला नयाँ जनादेशमा जानका लागि संसद विघटन गर्न पाउनुपर्ने विवादास्पद भनाई राखेका छन् ।

बुधबार पारिवारिक–निजी वन संघ नेपालको ९ औं स्थापना दिवसको अवसरमा आयोजित कार्यक्रमलाई सम्बोधन गर्दै उनले दलहरु आफू ठीक ढंगले नचल्ने र दोष जति संविधान, कानुन र व्यवस्थालाई थोपरेर उम्कन काम कलत भएको बताए । अध्यक्ष तिमिल्सनाले संविधान प्रयोगको गलत अभ्यासले संसद् र सरकारले प्रभावकारी काम गर्न नसकेको दावी गर्दै सरकार अप्ठेरोमा परेका बेला संसद् विघटन गर्ने कुरा संसारभरको उचित अभ्यास भएको बताए ।

तत्कालीन प्रधानमन्त्री केपी ओलीले संसद् विघटन गर्दा उत्पन्न परिस्थितिलाई लक्षित गर्दै अध्यक्ष तिमिल्सिनाले अहिले पनि राजनीतिक परिस्थिति उचित नभएको भन्दै सरकारले संसद विघटन गरेर नयाँ जनादेशमा जान पाउनुपर्ने जिकिर गरे । राष्ट्रपति निर्वाचनको एक दिनअघि अध्यक्ष तिमिल्सिनाबाट यस्तो प्रतिक्रिया आएलगत्तै राजनीतिक बृतमा विभिन्न टिक्काटिप्पणीसमेत सुरु भइसकेका छन् ।

नेपालमा विगतमा पटकपटक संविधान विघटन भएकाले संविधानमै विघटन नै नगर्ने कुरा उल्लेख हुँदा संसदबारे अहिले विरोधाभाष भइरहेको उनको भनाइ छ । अध्यक्ष तिमिल्सिनाले सरकार सञ्चालन गर्नेहरुले ढंग पुर्याएर संसद् चलाउन नसकेको बताए । उनले कागजलाई दोष दिएर उम्किन खाजेको आरोप लगाउँदै सरकारले केही गर्न नसक्ने अवस्था सिर्जना हुँदा संसद विघटन गरी जनतामा जाने कुरालाई राजनीतिक दलहरुले नै अन्देखा गर्नु गलत भएको बताए ।

उनले केही राजनीतिक दलहरुले संसद विघटन नगर्ने कुरालाई सबैभन्दा ठूलो क्रान्तिकारी र परिवर्तनकारी कामका रुपमा लिइरहेको बताउँदै सरकारले केही गर्न नसकेपछि संसद् विघटन गरेर निर्वाचनमा जाँदा भागबण्डा गर्ने, पार्टी फुटाउने, पार्टी फुटाउन अध्यादेश ल्याउने, मन्त्री बाँड्ने र जनतामा जाने कुरालाई बेवास्ता गर्नु गलत परिपाटी भएको तर्क गरे । राजनीतिक दलहरुले आफ्नो बानी सुधार नगरेसम्म परिवर्तनको नारा लिएर मात्रै कतै नपुग्ने उनको भनाइ छ ।