बौद्ध कलेज खोल्न गरिएको गाउँपालिका अध्यक्षको पत्रमाथि अख्तियारको छानबिन

२४ फागुन, काठमाडौं । अख्तियार दुरुपयोग अनुसन्धान आयोगले मुस्ताङको बारागुङ मुक्तिक्षेत्र गाउँपालिकाका अध्यक्ष रिनजिङ नाम्गेल गुरूङमाथि अनुसन्धान सुरु गरेको छ ।

यो गाउँपालिका हालै मात्र भारतले बौद्ध कलेज खोल्न गरेको प्रस्तावबारे विवादमा तानिएको क्षेत्रमा पर्दछ । अध्यक्ष गुरूङले बौद्ध कलेज निर्माणका लागि सन् २००७ मा स्थापना गरिएकाे साक्या बौद्ध संघको पत्रलाई हेरेर भारतीय दूतावाससँग आर्थिक सहयोगका लागि गएकाे मंसिर ६ गते पत्राचार गरेको विषयमा छानबिन सुरु गरिएको हो ।

स्थानीय तहले वैदेशिक सहयोग माग्नुअघि अनिवार्य रुपमा संघीय सरकारको अनुमति लिनुपर्ने संवैधानिक व्यवस्था रहेको छ । तर अख्तियार दुरुपयोग अनुसन्धान आयोग (पहिलो संशोधन) ऐन, २०४८ मा उल्लेख भएको व्यवस्थाको खिलाफमा निर्णय गरेको पाइएको भन्दै उनी अनुसन्धानको घेरामा तानिएका हुन् ।

उक्त व्यवस्थाअनुुसार सार्वजनिक पदधारण गरेका व्यक्तिले जानीजानी वा लापरबाही साथ आफूलाई प्राप्त अधिकार बदनियत साथ वा स्वेच्छाचारी रुपमा प्रयोग गर्न नपाइने व्यवस्था छ ।

सिफारिस गरेको कुरा उनले स्वीकार गरेका छन् । सरकारको निर्देशनमा सत्यतथ्य पत्ता लगाउन आयोगले अनुसन्धानका काम सुरु गरिसकेको आयोगको भनाइ छ ।

राष्ट्रलाई ‘घात’ गरेर सरकारले भारतलाई कलेज खोल्न दिएको भन्दै एमालेका अध्यक्ष केपी शर्मा ओलीले चर्को विरोध गरेका थिए । तर सरकारका प्रवक्ता एवं संचारमन्त्री रेखा शर्माले भने कलेज खोल्नेबारे कसैलाई पनि अनुमति नदिएको स्पष्ट पारेकी छन् ।