गठबन्धनका साझा उम्मेदवार पौडेललाई मत दिने रास्वपाको गोप्य निर्णय

२५ फागुन, काठमाडौं । राष्ट्रिय स्वतन्त्र पार्टीले राष्ट्रपतिको निर्वाचनमा नेपाली कांग्रेसका उम्मेदवार रामचन्द्र पौडेललाई मत दिने निर्णय गरेको छ । निर्वाचन आचारसंहिताका कारण बैठकको निर्णय भने सार्वजनिक गरिएको छैन् ।

उसले निर्वाचन आयोगले आचासंहिता लागु गरेको अवस्थामा कसैले पनि कसैलाई मतदान दिने कुरा सार्वजनिक गर्न नमिल्ने भनेपछि पौडेललाई मत हाल्ने गोप्य निर्णय गरेको हो ।

रास्वपा कार्यालय बिहीबार बसेको पार्टी पदाधिकारी र संसदीय दलको बैठकले मतदान सकिनु दुई घन्टाअघि पौडेललाई मत दिने निर्णय गरेको एक नेताले नेपालबहसलाई जानकारी दिए । पार्टीले आधिकारिक रूपमा भने कसलाई मत दिने कुरा सार्वजनिक नगर्ने निर्णय गरेको उनले बताए । बैठकपछि नेपालबहससँग कुराकानी गर्दै रास्वपा संसदीय दलका नेता डिपी अर्यालले यो जानकारी दिएका हुन् ।

उनले पार्टीका सबै सांसदले एकै उम्मेदवारलाई मत दिने निर्णय गरेको तर आचार संहिताका कारण सार्वजनिक रूपमा भन्न नमिल्ने बताए । रास्वपाका प्रतिनिधि सभामा १९ जना सांसद छन् । रास्वपाका मन्त्रीहरु सरकारमा नरहेपनि उसले सरकारलाई दिएको समर्थन कायमै राखेको छ ।