राष्ट्रपति निर्वाचनमा मतदान जारी, ६०३ सांसदले गरे मतदान

२५ फागुन, काठमाडौं । राष्ट्रपति निर्वाचनको जारी मतदानमा अहिलेसम्म ६०३ मत खसेको छ । संघीय संसद राष्ट्रियसभा र प्रतिनिधिसभा सदस्य तथा ७ वटै प्रदेशसभा सदस्यहरुले छुट्टाछुट्टै मतदान केन्द्रमा मतदान गरिरहेका छन् ।

बिहीबार बिहान १० बजे सुरु भएको मतदान दिउँसो साढे १२ बजेसम्म ६०३ सांसदले मतदान गरेको निर्वाचन आयोगले जनाएको छ ।

नयाँबानेश्वरस्थित राष्ट्रपति तथा उपराष्ट्रपति निर्वाचन कार्यालयका अनुसार दिउँसो साढे १२ बजेसम्म संघीय संसदका २६७ र प्रदेशसभाका ३३६ जना सदस्यले मतदान गरेका छन् । मतदान प्रक्रिया दिउँसो ३ बजेसम्म चल्ने कार्यालयले जनाएको छ ।

संघीय संसद् र प्रदेशसभा सदस्य गरी ८८३ जना मतदाता रहेका छन् । जसमध्ये चितवन २ र मनाङका सदस्य रिक्त रहेकाले ८८१ जनाले मतदानमा भाग लिन पाउनेछन् । यसमा पनि वयक्ति हत्यामा प्रहरीको सूचीमा फरार सूचीमा रहेका एमालेका सांसद लक्ष्मी महतो कोइरी सहभागी भएका छैनन् ।

मतदानको अन्तिम समय आइपुग्दा रास्वपाले भने कांग्रेसका वरिष्ठ नेता उम्मेदवार रामचन्द्र पौडेललाई मत दिने निर्णय केहीबेर अघि मात्र गरेको छ । निर्वाचनमा पौडेल र एमालेका नेता सुवाचन्द्र नेम्वाङ प्रतिस्पर्धामा छन् ।